بابر اعظم کا فکسنگ کے الزامات پر ایک ارب ہرجانے کا نوٹس

پاکستان کرکٹ ٹیم کے کپتان بابر اعظم نے اینکر مبشر لقمان کو اپنے اور  اہل خانہ پر جھوٹے الزامات لگانے پر ایک ارب روپے  ہتک عزت کا نوٹس جاری کر دیا ہے۔

ذرائع کے مطابق مبشر لقمان کی جانب سے  اعظم کے خلاف سوشل میڈیا پر الزامات کے بعد کپتان کو اپنے وکلا کے ذریعے 1 ارب روپے کا ہتک عزت کا نوٹس بھیج دیا ہے۔

نوٹس میں  لکھا گیا ہے کہ مبشر لقمان اپنے الزامات ثابت کریں ورنہ معافی مانگیں اور ایک ارب روپے ہرجانہ ادا کریں کیونکہ الزامات کی وجہ سے بابر اعظم کی ساکھ مجروح ہوئی اور ان کی شہرت کو ٹھیس پہنچی ہے۔

نوٹس میں مزید لکھا گیا ہے کہ اگر مبشر لقمان نے معافی  نہ مانگی اور الزامات کو واپس نہ لیا تو پھر اُن کے خلاف قانونی کارروائی کی جائے گی۔

ادھر پاکستان کے اسسٹنٹ کوچ اظہر محمود نے بھی آئی سی سی ٹی ٹوئنٹی ورلڈ کپ میں ٹیم کی مایوس کن کارکردگی کے بعد سوشل میڈیا پر اپنے اوپر عائد ہونے والے الزامات پر ردعمل دے دیا۔

انہوں نے سماجی رابطے کے پلیٹ فارم پر اپنے جاری بیان میں لکھا کہ الزامات کی وجہ سے انہیں اور ان کے خاندان کو ہراساں کیا جارہا ہے،  وہ بغیر ثبوت کے بے بنیاد دعوے کرنے والوں کے خلاف قانونی کارروائی کا حق محفوظ رکھتے ہیں۔

محمود نے غلط معلومات پھیلانے کی مذمت کی اور جھوٹے الزامات لگا کر توجہ حاصل کرنے کی کوشش کو ناقابل قبول قرار دیا۔ انہوں نے اس عزم کا اظہار کیا کہ وہ ان لوگوں کے خلاف سخت کارروائی کریں گے جنہوں نے ان کے اور ان کے خاندان کے خلاف بے بنیاد دعوے کیے ہیں۔