بابر اعظم کی شادی سے متعلق محمد رضوان کا اہم بیان

قومی ٹیم کے وکٹ کیپر بلے باز  محمد رضوان کاکہنا ہے کہ شاہین آفریدی اور شاداب خان کو میں نے ہی شادی کا مشورہ دیا تھا اور اب بابر اعظم بھی جلد شادی کے بندھن میں بندھنے والے ہیں۔ 

نجی چینل سے بات کرتے ہوئے قومی بلے باز کا کہنا تھا کہ شوہر اور بیوی کا رشتہ اللّٰہ نے بہت مقدس بنایا ہے، میں چاہتا ہوں ایمانی صفات جلد پوری ہو جائیں، شادی کرنا اللّٰہ کا حکم ہے۔

محمد رضوان نے کہا کہ بابر اعظم اور میں ایک دوسرے سے زندگی کے مختلف پہلوؤں پر مشورہ کرتے ہیں،بابر اعظم کے ساتھ بہت دوستی ہے، رات دیر تک کمرے میں رہتے ہیں۔

انہوں نے کہا کہ کسی بھی وقت ہم دونوں ایک دوسرے کے کمرے میں چلے جاتے ہیں، بابر اعظم اور میں ایک دوسرے سے سیکھتے رہتے ہیں۔کسی اور کے کمرے میں جانے سے پہلے میسج کرتے ہیں لیکن بابر اعظم اور میرے درمیان ایسا کچھ نہیں۔

محمدرضوان کا کہناتھا کہ ملتان سلطانز کی طرف سے احسان اللّٰہ، آصف علی، محمد علی ابھر کر سامنے آئے، ایک زمانہ تھا جب لاہور، کراچی اور سیالکوٹ سے کھلاڑی ملتے تھے،پاکستان کی ڈومیسٹک کرکٹ میں کافی عرصے سے بولرز آ رہے ہیں۔

انہوں نے کہا کہ کلب کرکٹ مضبوط ہونے کی وجہ سے خیبر پختونخوا کی کرکٹ ترقی کر رہی ہے، صوبے کے کرکٹرز بہت محنتی ہیں،پشاور اور خیبر پختونخوا میں کلب کرکٹ بہت ہائی اسٹینڈرڈ کی ہے، رات کو پاکستان کا میچ کھیل کر آتے ہیں اور صبح کلب کا میچ بھی کھیلتے ہیں۔