ڈومیسٹک کرکٹ کی بحالی کیلیے سینئرز کی خدمات طلب، ماہانہ تنخواہ 50 لاکھ ہوگی

پاکستان کرکٹ بورڈ نے ڈومیسٹک کرکٹ کے ڈھانچے کے لیے سیئنر کرکٹرز کی خدمات حاصل کی ہیں جنہیں ماہانہ پچاس لاکھ روپے تنخوا دی جائے گی۔

پی سی بی نے ڈومیسٹک کرکٹ ٹیموں کی مینٹور شپ کیلیے مصباح الحق، شعیب ملک، سرفراز احمد، ثقلین مشتاق سمیت دیگر کرکٹرز سے معاہدہ کیا ہے۔

یہ لیجنڈز نہ صرف اپنی متعلقہ ٹیموں کی رہنمائی کریں گے بلکہ مشیر کے طور پر بھی کام کریں گے، جو بورڈ کو کھلاڑیوں کی فارم اور فٹنس کے بارے میں قیمتی بصیرت فراہم کریں گے۔

ڈومیسٹک ٹیم کو 10 رکنی عملہ سپورٹ کرے گا، جس میں ہیڈ کوچ، بیٹنگ کوچ، باؤلنگ کوچ، اور فیلڈنگ کوچ شامل ہیں، یہ مینٹورز لاہور، راولپنڈی، سیالکوٹ، ملتان اور کراچی جیسے بڑے شہروں میں تعینات ہوں گے۔

ماہرین کی ٹیم اپنی ٹیموں کی کامیابی کو یقینی بنانے کے لیے سرپرستوں کے ساتھ مل کر کام کرے گی۔ مینٹورز کی پہلی اسائنمنٹ چیمپئنز ون ڈے کپ ہو گی، جو 12 سے 29 ستمبر تک فیصل آباد کے اقبال سٹیڈیم میں شیڈول ہے۔

توقع ہے کہ یہ ٹورنامنٹ گیم چینجر ہو گا، جس میں ملک بھر کے بہترین کرکٹرز سنگل لیگ کے مقابلے میں شامل ہوں گے۔ یہ ایونٹ تقریباً دو سال بعد فیصل آباد میں ہورہا ہے جس کے ذریعے ڈومیسٹک کرکٹ کی بحالی اور واپسی کا امکان ظاہر کیا جارہا ہے۔