چیمپئنز ٹرافی: بھارت نے پاکستان کوبا آسانی 6 وکٹوں سے شکست دے دی

چیمپئنز ٹرافی کے ہائی وولٹیج میچ میں ویرات کوہلی کی شاندار سنچری کی بدولت بھارت نے پاکستان کو 6 وکٹوں سے شکست دے دی۔

بھارت نے  242 رنز کا ہدف  43 اوور میں 4  وکٹ کے نقصان پر پورا کرلیا۔

بھارت کے پہلے آؤٹ ہونے والے کھلاڑی کپتان روہت شرما تھے جنہیں شاہین آفریدی نے بولڈ کیا، روہت شرما 20 رنز بنا کر آؤٹ ہوئے۔ ان کے بعد شبمن گل 46 رنز بنا کر ابرار کے ہاتھوں بولڈ ہوگئے۔

شریاس ایئر 56 رنز بناکر کیچ آؤٹ ہوئے، انہیں خوشدل شاہ نے آؤٹ کیا۔ ہاردیک پانڈیا 8 رنز بناکر شاہین شاہ آفریدی کی گیند پر کیچ آؤٹ ہوئے۔

اس سے قبل دبئی انٹرنیشنل کرکٹ اسٹیڈیم میں کھیلے جارہے میچ میں قومی ٹیم کے کپتان محمد رضوان نے بھارت کے خلاف ٹاس جیت کر بیٹنگ کا فیصلہ کیا۔ پاکستان نے پہلے بیٹنگ کرتے ہوئے انتہائی مشکل حالات میں 242 رنز بنائے۔

قومی ٹیم کی ابتدائی دو وکٹیں 47 پر گر گئیں تھیں جس کے بعد سعود شکیل اور رضوان نے 104 رنز کی پارٹنر شپ قائم کر کے ٹیم کی پوزیشن مستحکم کی۔

پھر 33ویں اوور میں رضوان 151 کے مجموعی جبکہ 46 کے انفرادی اسکور پر پویلین لوٹے، انہوں نے 70 گیندوں کا سامنا کیا۔

اس کے بعد سعود شکیل 159 کے مجموعی اسکور پر 62 رنز بناکر آؤٹ ہوئے۔

طیب طاہر 165 جبکہ سلمان علی آغا اور شاہین آفریدی 200 کے مجموعی اسکور پر آٹ ہوئے۔ آٹھویں آؤٹ ہونے والے کھلاڑی نسیم شاہ تھے جنہوں نے 14 رنز کی اننگز کھیلی جبکہ 222 کے مجموعی اسکور پر پویلین لوٹے۔

پھر 241کے مجموعی اسکور پر حارث رف 8 رنز بناکر آؤٹ ہوئے اور 49.4اوور میں خوشدل شاہ 241 کے مجموعی اسکور پر 39 گیندوں پر 38 رنز بناکر آؤٹ ہوئے۔

پاکستان نے پوری اننگز میں صرف تین چھکے لگائے جبکہ 14 چوکے لگائے۔