کپتان رضوان نے آسٹریلیا سے شکست پر مثبت پہلو تلاش کرلیا

آسٹریلیا کی بی ٹیم نے ٹی 20 سیریز میں پاکستان کو دوسرے میچ میں شکست دے کر سیریز دو صفر سے اپنے نام کرلی جبکہ رضوان نے اس شکست کا مثبت پہلو تلاش کرلیا ہے۔

سڈنی میں تین ٹی 20 میچز کا دوسرا میچ کھیلا گیا جس میں قومی ٹیم کا کوئی بڑا بلے باز اچھی کارکردگی نہیں دکھا سکا، رضوان، نائب کپتان اور بابر جیسے بلے باز آسٹریلوی بالرز کے آگے بے بس رہے۔

سڈنی میں کھیلے گئے دوسرے ٹی 20 میچ میں پاکستان نے آسٹریلیا کے 147 رنز کے جواب میں اپنی اننگز کا آغاز کیا، تاہم ابتدا ہی سے ٹیم لڑکھڑا گئی اور آسٹریلوی بالرز کے سامنے زیادہ دیر ٹھہر نہیں سکی۔

قومی ٹیم آسٹریلیا کی جانب سے دیے گئے 148 رنز کے ہدف کے جواب میں 134 رنز پر ڈھیر ہو گئی۔ عثمان خان 52 رنز کی اننگز کھیل کر ٹاپ اسکورر رہے۔

قومی کرکٹ ٹیم کے کپتان محمد رضوان نے آسٹریلیا سے ٹی 20 سیریز میں شکست پر مثبت پہلو تلاش کیا اور کہا کہ شکست تو ضرور ہوئی مگر آپ مثبت پہلو دیکھیں تو لڑکوں نے بہت اچھی بولنگ کی ہے۔

رضوان نے کہا کہ ’ہمیں معلوم ہے آسٹریلیا آسان ٹیم نہیں ہے مگر آج کے میچ میں ہم نے انہیں کئی مواقع دیے جس کی وجہ سے میچ ہاتھ سے نکل گیا۔ کپتان نے کہا کہ میں اپنے آپ کو حالات کے حساب سے تیار کرتا ہوں۔