نیوزی لینڈ نے بھارت کو ہوم ٹیسٹ سیریز میں وائٹ واش کردیا

ممبئی: نیوزی لینڈ نے بھارت کو تیسرے ٹیسٹ میں 25 رنز سے شکست دے کر تین ٹیسٹ میچوں کی سیریز میں وائٹ واش کردیا۔

بھارتی سورما ممبئی میں کھیلے گئے تیسرے اور آخری ٹیسٹ میچ میں 147 رنز کے ہدف کا تعاقب بھی نہ کرسکے، پوری ٹیم 121رنزپر پویلین لوٹ گئی۔

نیوزی لینڈ کے اسپنر اعجاز پٹیل نے تیسرے ٹیسٹ میں 6 اور گلین فلپس نے تین وکٹیں حاصل کیں۔ اعجاز   پٹیل نے میچ میں 11 شکار کیے۔

تیسرے ٹیسٹ کی دوسری اننگز میں بھارتی کپتان روہت شرما نے 11 رنز بنائے جب کہ شبھمن گل، ویرات کوہلی اور سرفراز خان ایک ایک رنز بناسکے۔ وکٹ کیپربیٹر رشبھ پنت نے 64 رنز کے ساتھ مزاحمت کی تاہم وہ بھی ٹیم کو تاریخی شکست سے نہ بچاسکے۔

نیوزی لینڈ کی ٹیم پہلی اننگز میں 235 اوردوسری اننگز میں 174رنز  بنا کر آوٹ ہوئی جب کہ میزبان بھارتی ٹیم پہلی اننگز 263 اور دوسری اننگز میں 121 رنز بناسکی۔