ٹی ٹوئنٹی ورلڈکپ: انگلینڈ امریکا کو روند کر سیمی فائنل میں پہنچ گئی

بارباڈوس: انگلینڈ نے امریکا کو ٹی ٹوئنٹی ورلڈکپ کے سپر 8 مرحلے میں 10 وکٹوں کی شکست دے کر سیمی فائنل میں رسائی حاصل کرلی۔

امریکا کو ہراکر سیمی فائنل میں پہنچنے والی انگلینڈ پہلی ٹیم بن گئی۔ انگلش ٹیم نے 116 رنز کا ہدف 10ویں اوور میں حاصل کرلیا، کپتان جوزبٹلر نے 38 گیندوں پر ناقابل شکست 83 رنز بنائے جب کہ فل سالٹ نے 21 گیندوں پر 25 رنز کی اننگز کھیلی۔

امریکی ٹیم پہلے کھیل کر 19ویں اوور میں 115رنز پر پویلین لوٹ گئی تھی، نتیش کمار 30، کورے اینڈرسن 29، ہرمیت سنگھ 21 رنز بنا سکے۔

تجربہ کار دائیں ہاتھ کے تیز گیند باز کرس جارڈن نے اتوار کو تاریخ رقم کرتے ہوئے T20Is میں ہیٹ ٹرک کرنے والے انگلینڈ کے پہلے بولر بن گئے۔ فاسٹ بولر کرس جارڈن نے پانچ گیندوں پر چار وکٹیں اڑائیں۔

انگلینڈ نے اس جیت کے ساتھ سیمی فائنل کے لیے کوالیفائی کر لیا ہے جب کہ جنوبی افریقا اور ویسٹ انڈیز کا میچ کوارٹر فائنل کی حیثیت اختیار کر گیا ہے۔