وسیم اکرم نے اپنی کامیابیوں کا کریڈٹ کونسے کرکٹر کو دیا ؟

کراچی: پاکستان کے لیجنڈری فاسٹ بولر اور سوئنگ کے سلطان وسیم اکرم نے ورلڈکپ فاتح سابق کپتان عمران خان کو سب سے بہترین قرار دیدیا۔

 انگلش کرکٹرز مائیکل وان، سر الیسٹر کْک، ڈیوڈ لائیڈ اور فل ٹفنل کے پوڈکاسٹ میں گفتگو کرتے ہوئے وسیم اکرم نے کہاکہ عمران خان بلاشبہ ان کے سب سے بہترین کپتان تھے تاہم وہ قدرتی طور پر اتنے باصلاحیت نہیں تھے، بلکہ اپنی محنت اور عزم سے کامیابی حاصل کی۔

وسیم اکرم نے کہا کہ میں نے کرکٹ میں جو کچھ کیا، میدان میں اور میدان سے باہر اس کا کریڈٹ عمران خان کو جاتا ہے، وہ ہمیشہ ہمیں اعتماد دیتے، فرنٹ سے لیڈ کرتے اور اپنی صلاحیتوں پر یقین رکھتے تھے۔

انہوںنے کہاکہ لوگ مجھے قدرتی ٹیلنٹڈ بولر کہتے تھے، لیکن عمران خان کی کامیابی سخت محنت کی مرہونِ منت تھی، کپتان قدرتی ٹیلنٹڈ نہیں تھے، انہوں نے محنت سے سب کچھ حاصل کیا، 1976ء میں اپنی بالنگ ایکشن ہی بدل ڈالا، جو انتہائی مشکل کام ہے لیکن وہ اتنے پْرعزم تھے کہ کر دکھایا۔

سابق فاسٹ بولر نے کہا کہ عمران خان ٹیم کے کھلاڑیوں سے 100 فیصد کارکردگی چاہتے تھے اور سست روی برداشت نہیں کرتے تھے، اگر کوئی کھلاڑی میدان میں سست ہوتا تو وہ ڈانٹ دیتے تھے لیکن اگر آپ نے پوری محنت کی ہو اور نتیجہ اچھا نہ نکلے تو وہ اسے تسلیم کرتے تھے۔