بھارت، آرمی کوارٹرز سے زیادتی کے بعد قتل کی گئی 8 سالہ بچی کی لاش برآمد

نئی دہلی: بھارتی دارالحکومت نئی دہلی میں کڑی نگرانی والے آرمی کوارٹرز سے 8 سالہ بچی کی لاش برآمد ہوئی۔

بھارتی میڈیا کے مطابق نئی دہلی کے کینٹونمنٹ ایریا میں واقع آرمی کوارٹروں سے 8 سالہ بچی کی لاش برآمد ہوئی۔ بچی کو زیادتی کے بعد گلا گھونٹ کر قتل کیا گیا تھا۔

 پولیس حکام کا کہنا تھا کہ بچی پیرکی شام سخت نگرانی والے علاقے سے لاپتا ہوئی تھی جس کی تلاش جاری تھی۔ بچی کی لاش شنکر وہاڑ ملٹری اسٹیشن میں ایک خالی گھر سے برآمد ہوئی۔

 بچی سے زیادتی اور قتل کے الزام میں 19 سالہ پڑوسی کو گرفتار کرلیا گیا۔ ملزم کو سی سی ٹی وی کیمرے کی مدد سے گرفتار کیا گیا۔پولیس کے مطابق ملزم نے دوران تفتیش انکشاف کیا کہ بچی مجھے بھائی کہتی تھی۔ اسے چیزوں کا لالچ دے کر خالی گھر میں لے گیا۔

زیادتی کی کوشش کے دوران بچی نے مزاحمت کی تو گلا گھونٹ کر مار دیا۔ پولیس کو گمراہ کرنے کے لیے بچی کو قتل کرنے کے بعد اس کے گلے میں اسکارف باندھ دیا تا کہ خود کشی معلوم ہو۔ ملزم سے مزید تحقیقات جاری ہیں۔