افغان طالبان میں پھوٹ پڑ گئی، اہم شخصیت سے استعفے سے حکومت کو بڑا دھچکا

طالبان حکومت کے اندر شدید اختلافات کی اطلاعات کے درمیان وزیر داخلہ سراج الدین حقانی نے اپنا استعفیٰ امیر طالبان ملا ہیبت اللہ اخوندزادہ کو پیش کر دیا ہے۔

عالمی خبر رساں اداروں کے مطابق، ملا ہبتہ اللہ اخوندزادہ نے سراج الدین حقانی کا استعفیٰ منظور کر لیا ہے۔  

استعفے کی وجوہات کے بارے میں سراج الدین حقانی یا طالبان حکومت کی جانب سے کوئی واضح بیان سامنے نہیں آیا ہے۔ تاہم، میڈیا رپورٹس کے مطابق، استعفے کی بنیادی وجہ طالبان قیادت کے درمیان کئی اہم مسائل پر اندرونی اختلافات ہیں۔

ان اختلافات کے حل نہ ہونے کے باعث سراج الدین حقانی کافی عرصے سے وزارتِ داخلہ کی ذمہ داریوں سے غیر حاضر تھے۔  

رپورٹس میں یہ بھی بتایا گیا ہے کہ حقانی نیٹ ورک اور طالبان کی مرکزی قیادت کے درمیان خواتین کے حقوق جیسے معاملات پر بھی اختلافات پائے جاتے ہیں۔ اس کے علاوہ، حقانی نیٹ ورک کے ایک اہم کمانڈر اور وزیر برائے مہاجرین خلیل الرحمان حقانی دسمبر میں ایک خودکش حملے میں جاں بحق ہو گئے تھے، جس کے بعد سے حقانی گروپ اور طالبان قیادت کے درمیان تعلقات میں کشیدگی بڑھ گئی تھی۔  

سراج الدین حقانی کے استعفے سے طالبان حکومت کے اندرونی اختلافات اور چیلنجز مزید واضح ہو گئے ہیں، جس سے حکومتی یکجہتی پر سوالات اٹھ رہے ہیں۔