حلب شہر میں شامی اور کرد فورسز کے درمیان کشیدگی میں اضافہ

حلب: شام کے شہر حلب میں کردش ملیشیا اور شام کی سرکاری فوج کے درمیان گزشتہ رات سے کشیدگی کا آغاز ہوگیا ہے۔

عرب میڈیا کے مطابق شام کی وزارتِ دفاع نے کہا کہ شامی افواج نے علاقے میں تعیناتی شروع کردی ہے۔شامی وزارت دفاع کی جانب سے مزید کہا گیا کہ ہم کرد ایس ڈی ایف کے ساتھ معاہدے پر قائم ہیں، اور ہمارا فوجی آپریشن کرنے کا کوئی ارادہ نہیں ہے۔

دوسری جانب کرد گروپ ایس ڈی ایف نے الزام لگایا کہ شام کی قائم مقام حکومت اشتعال انگیزی کرتے ہوئے اس علاقے میں ٹینکوں کے ساتھ آگے بڑھ رہی ہے۔

قبل ازیں داعش کے خلاف جنگ میں کرد گروپ ایس ڈی ایف نے اہم کردار ادا کیا تھا اور امریکی حکومت نے کرد گروپ اور شام میں قائم ہونے والی نئی حکومت کے درمیان معاہدہ کروایا تھا۔