کیلیفورنیا میں آگ کے بعد سیلاب کا خدشہ

کیلیفورنیا: امریکی ریاست کیلیفورنیا کو آگ کے بعد سیلاب کے نقصانات کا خدشہ ہے جبکہ مکان کے کرایوں میں ہوشربا اضافہ ہوگیا۔

غیر ملکی میڈیا کے مطابق جنوبی کیلیفورنیا میں موسم سرما کی پہلی شدید بارشوں سے سیلاب کی پیشگوئی کردی گئی ہے۔

میڈیا رپورٹس کے مطابق نیشنل ویدر سروس نے کہا کہ سیلاب کی وجہ سے مٹی کے تودے گرنے کے واقعات بھی رونما ہو سکتے ہیں۔

دوسری جانب لاس اینجلس اور ونچورا کانٹیز میں لگی آگ کو اہلکاروں نے بمشکل بجھایا ہے، آگ لگنے کے باعث لاس اینجلس کے شہری اذیت سے دوچار ہیں کیونکہ مکانات تباہ ہونے کے سبب پوری کانٹی میں گھروں کے کرایوں میں 20فیصد اضافہ کردیا گیا ہے۔

میڈیا رپورٹس کے مطابق آگ لگنے کے پہلے 2ہفتوں ہی میں کانٹی کے 30شہروں میں گھروں کا کرایہ مقرر کردہ 10فیصد بڑھنے کے بجائے غیرقانونی طورپر 2گنا بڑھایا جا چکا ہے۔