مشی گن کے شہر کی ہولناک صورتحال، لائن پھٹنے سے جمع پانچ فٹ پانی برف میں تبدیل

امریکی ریاست مشی گن کے علاقے ڈیٹرائٹ میں ایک بڑی پانی کی پائپ لائن پھٹنے کے بعد ہولناک صورت حال ہوگئی ہے۔

پائپ لائن پھٹنے کے نتیجے میں سڑکیں پانچ فٹ پانی میں ڈوب گئیں اور سخت سردی کے باعث یہ پانی جم کر برف بن گیا ہے۔

اس واقعے کے بعد سینکڑوں رہائشیوں کو ان کے گھروں سے نکالنا پڑا۔

یہ واقعہ پیر کے روز پیش آیا، جب ڈیٹرائٹ کے جنوب مغربی علاقے میں 1930 میں تعمیر کی گئی 54 انچ (1.4 میٹر) کی سٹیل واٹر ٹرانسمیشن لائن پھٹ گئی۔ اچانک آنے والے سیلاب نے گلیوں کا رخ موڑ دیا، جس سے رہائشیوں میں خوف و ہراس پھیل گیا۔ ایمرجنسی ٹیموں نے 400 گھروں کو خطرے کے زون میں قرار دے دیا۔

سوشل میڈیا پر گردش کرنے والی ویڈیوز میں دیکھا جا سکتا تھا کہ گاڑیاں برف میں جمے ہوئے سیلاب میں پھنسی ہوئی ہیں، جب تک کہ پانی بالآخر نکل نہیں گیا۔ حکام نے بتایا کہ کم از کم 190 گھروں کے تہہ خانوں میں پانی بھر گیا، 72 گھروں کی بجلی منقطع ہو گئی، اور 174 گھروں میں ہیٹنگ سسٹم کام نہیں کر رہا تھا۔

خراب ہونے والی پائپ لائن کی مرمت کے کام جاری ہیں، لیکن حکام کے اندازے کے مطابق پانی کی سپلائی بحال ہونے میں کم از کم دو ہفتے لگیں گے۔ پانی کی سپلائی بحال کرنے کے لیے پائپ کے 12 فٹ کے حصے کو تبدیل کیا جائے گا۔ یہ پائپ لائن اصل میں ڈیٹرائٹ ریور پمپنگ اسٹیشنز سے پانی لے کر چھوٹی پائپ لائنز کے ذریعے گھروں تک پہنچاتی تھی۔

بے گھر ہونے والے رہائشیوں نے اپنے گھروں کی حالت کے بارے میں تشویش کا اظہار کیا، کیونکہ بہت سے لوگوں کو جلدی میں گھر چھوڑنا پڑا جبکہ سیلاب کا پانی مسلسل بڑھ رہا تھا۔

ایک رہائشی نے ایسوسی ایٹڈ پریس کو بتایا، "میں وہاں گیا جب پانی ابھی زیادہ نہیں تھا۔ میں نے چیزیں میزوں پر رکھنے کی کوشش کی، لیکن پانی اتنا زیادہ تھا کہ ہر چیز گر گئی۔ یہ ڈرینز سے بہت تیزی سے اندر آرہا تھا۔"

ڈیٹرائٹ واٹر اینڈ سیوریج ڈیپارٹمنٹ کے ڈائریکٹر گیری براؤن نے میڈیا کو بتایا کہ بے گھر ہونے والے رہائشیوں کو گھر واپس آنے میں چھ ہفتے تک کا انتظار کرنا پڑ سکتا ہے۔

سیلاب کے دوران، درجہ حرارت میں شدید کمی کے باعث ایک خاندانی گاڑی میں رہنے والے دو بچے برفباری سے جم کر ہلاک ہو گئے۔