طاقت ور ترین ایئرفورس کی فہرست میں پاکستان بھی شامل

ایک ویب سائٹ نے فضائی طاقت رکھنے والے دس ممالک کی فہرست جاری کی ہے جس میں پاکستان بھی شامل ہے۔

ویب سائٹ کی رپورٹ میں بتایا گیا ہے کہ اس کا تعین فضائیہ کے پاس موجود جنگی طیاروں، امدادی طیاروں اور ہیلی کاپٹر سے کیا گیا ہے۔

رپورٹ کے مطابق امریکا دنیا میں سب سے زیادہ جنگی جہاز، طیارے اور ہیلی کاپٹر رکھنے والا ملک ہے جبکہ دوسرا نمبر روس اور پھر تیسرا چین کا ہے۔

رپورٹ میں چوتھا نمبر بھارت، پانچواں جنوبی کوریا، جاپان کا چھٹا جبکہ پاکستان ساتویں نمبر پر ہے۔ مصر دنیا کا آٹھواں طاقتور ملک جبکہ ترکیہ نواں اور فرانس دسواں ملک ہے۔

رپورٹ کے مطابق امریکا کی فضائیہ کے پاس 5 ہزار 737 جیٹ طیارے، 1854 ہیلی کاپٹر جبکہ 3 ہزار 722 امدادی جہاز ہیں اور اسی کے ساتھ وہ پہلے نمبر پر ہے۔

روس کے پاس امریکی فضائی صلاحیت کی ایک تہائی طاقت ہے اور اُس کے پاس 1,554 ہیلی کاپٹر، 809 لڑاکا طیارے اور 610 امدادی و معاون طیارے موجود ہیں۔ روس یوکرین جنگ کے بعد سے 220 طیاروں سے محروم بھی ہوچکا ہے۔

تیسرے نمبر پر چین ہے جس نے حال ہی میں اپنے بیڑے میں لڑاکا جیٹ شامل کیا جبکہ وہ سپر سونک جہاز بھی بنارہا ہے۔

انڈیا کے پاس 2296 جہاز و ہیلی کاپٹر، جنوبی کوریا 1576، جاپان 1459 جبکہ پاکستان کے پاس 1434 جنگی جہاز اور ہیلی کاپٹر موجود ہیں۔

مصر کے پاس 1080، ترکیہ کے پاس 1069 اور فرانس کے پاس صرف 972 طیارے و ہیلی کاپٹر موجود ہیں۔