یمن میں کشتی الٹنے سے 13 تارکین وطن ہلاک

صنعائ: یمن کے سمندر میں تارکین وطن کی کشتی الٹنے سے 13 تارکین وطن ہلاک جبکہ 14 لاپتہ ہو گئے ۔

غیرملکی خبررساں ادارے کے مطابق تارکین وطن کی ایک کشتی جس میں 25 ایتھوپیا اور دو یمنی شہری سوار تھے، یمن کے صوبہ تعز کے ساحل کے قریب سے گزر رہی تھی۔

بین الاقوامی ادارہ برائے مہاجرت (آئی او ایم) نے کہا کہ یمن کے ساحل پر ایک کشتی الٹنے سے 13 افراد ہلاک اور 14 دیگر لاپتہ ہو گئے ہیں۔

ہلاک ہونے والوں میں 11 مرد اور دو خواتین شامل ہیں جنہیں آبنائے باب المندب کے ساحل سے برآمد کیا گیا ہے جو عالمی اجناس کی ترسیل کے لیے دنیا کے اہم ترین سمندری راستوں میں سے ایک ہے۔

رپورٹ میں کہا گیا ہے کہ لاپتہ افراد کی تلاش کے لیے سرچ آپریشن جاری ہے جن میں یمنی کپتان اور ان کا معاون بھی شامل ہے، تاہم یہ واضح نہیں ہے کہ کشتی ڈوبنے کی وجہ کیا تھی۔

جولائی میں یمن کے شہر تعز کے ساحل پر کم از کم 45 پناہ گزینوں کو لے جانے والی ایک کشتی الٹ گئی تھی اور اس میں صرف چار افراد زندہ بچ سکے تھے۔