یونان میں کشتی الٹنے سے متعدد تارکین وطن جان سے گئے

یونان کے جنوبی جزیرے کے قریب کشتی الٹنے سے پانچ تارکین وطن لقمہ اجل بن گئے، جبکہ زندہ بچ جانے والے 39 افراد میں زیادہ تر پاکستانی شہریت کے حامل ہیں۔

غیر ملکی ذرائع ابلاغ کے مطابق یونان کے کوسٹ گارڈ نے بتایا کہ ریسکیو آپریشن جاری ہے اور تاحال متعدد لاپتہ افراد کی تلاش جاری ہے، حکام یہ بتانے سے قاصر ہیں کہ کشی میں مجموعی طور پر کتنے تارکین وطن سوار تھے۔

کوسٹ گارڈ نے کہا کہ انہیں کریٹ کے جزیرے پر منتقل کر دیا گیا ہے جبکہ لاپتہ ہونے والوں کی تعداد کی ابھی تک تصدیق نہیں ہو سکی ہے۔

حکام کے مطابق حادثے میں 39 افراد کو ریسکیو کرلیا گیا اور ان میں زیادہ تر کا تعلق پاکستان سے ہے، ان کو اس علاقے میں کارگو جہازوں کے ذریعے بچایا گیا ہے، ۔

گزشتہ روز الگ الگ واقعات میں مالٹا کے ایک کارگو جہاز نے گاوڈوس نے ایک کشتی سے 47 اور ایک ٹینکر نے یونان کے جنوب میں واقع چھوٹے سے جزیرے سے تقریبا 28 سمندری میل دور 88 تارکین وطن کو بچایا۔