پیٹرول اور ڈیزل کی قیمتوں میں اضافے کا امکان

عالمی مارکیٹ میں خام تیل کی قیمتوں میں مسلسل اضافے کے باعث ملک میں آئندہ 15 دن کے لیے پیٹرول اور ڈیزل کی قیمتوں میں نمایاں اضافے کا امکان ہے۔

اطلاعات کے مطابق پیٹرول میں 6 روپے 60 پیسے جبکہ ہائی سپیڈ ڈیزل میں 5 روپے 27 پیسے فی لیٹر تک اضافہ ہو سکتا ہے۔

دوسری جانب مٹی کے تیل اور لائٹ ڈیزل کی قیمتوں میں کمی متوقع ہے۔ رپورٹس کے مطابق مٹی کے تیل کی قیمت میں 3 روپے 74 پیسے جبکہ لائٹ ڈیزل میں 2 روپے 23 پیسے فی لیٹر تک کمی کی تجویز پیش کی گئی ہے۔

پیٹرولیم مصنوعات کی قیمتوں سے متعلق حتمی ورکنگ تیار کر لی گئی ہے۔ آئل انڈسٹری نے اپنی سفارشات تیل و گیس ریگولیٹری اتھارٹی (اوگرا) کو بھجوا دی ہیں۔ اوگرا کی جانب سے یہ سفارشات کل تک حکومت کو ارسال کر دی جائیں گی۔

ذرائع کے مطابق وزیراعظم کی حتمی منظوری کے بعد ہی پیٹرولیم مصنوعات کی نئی قیمتوں کا اعلان کیا جائے گا۔ اوگرا کی سفارشات کی روشنی میں ہی قیمتوں میں ردوبدل پر حتمی فیصلہ کیا جائے گا۔

یہ واضح رہے کہ عالمی مارکیٹ میں تیل کی قیمتوں میں اتار چڑھاؤ کے باعث ملک میں پیٹرولیم مصنوعات کی قیمتوں میں ہر پندرہ دن بعد ایڈجسٹمنٹ کی جاتی ہے۔