احمد شاہ کے چھوٹے بھائی کا اچانک انتقال، وجہ سامنے آگئی

سوشل میڈیا کے معروف اسٹار احمد شاہ کے چھوٹے بھائی عمر شاہ کے اچانک فانی دنیا سے کوچ کرنے کی وجہ سامنے آگئی۔

پیر کی صبح احمد شاہ نے اپنے سوشل میڈیا اکاؤنٹس پر یہ افسوسناک خبر شیئر کی تھی کہ ان کے چھوٹے بھائی اب اس دنیا میں نہیں رہے ہیں۔

سوشل میڈیا پوسٹ میں لکھا گیا ہمارے خاندان کا ننھا چمکتا ستارہ عمر شاہ اللہ کو پیارا ہوگیا، ساتھ ہی مداحوں سے ان کی مغفرت اور اہلِ خانہ کے لیے صبر کی دعا کی درخواست بھی کی گئی۔

مداحوں میں عمر شاہ اپنی معصوم مسکراہٹ اور شرارتی طبیعت کے باعث بہت پسند کئے جاتے تھے، وہ اکثر اپنے بڑے بھائی احمد شاہ کے ساتھ ویڈیوز اور ٹی وی پروگرامز میں دکھائی دیتے تھے، خصوصا رمضان ٹرانسمیشن کے دوران ان کی موجودگی ناظرین کو بہت پسند آتی تھی۔

عمر کے اہلخانہ کے مطابق وہ بالکل ٹھیک تھے لیکن رات کو اچانک طبیعت خراب ہوئی اور انہیں قے آئی۔ قے کے باعث کوئی چیز سانس کی نالی میں چلی گئی جس کے بعد انہیں سول اسپتال لے جایا گیا لیکن بدقسمتی سے وہ جانبر نہ ہوسکے۔