علی ظفر نے دو کمال کردیے، سب حیران

گلوکارعلی ظفر نے ایک اور سریلی آواز کی حامل گلوکارہ متعارف کرادیا اور اپنے نئے نغمے کی اے آئی کی مدد سے ویڈیو بھی بنا کر سب کو حیران کردیا۔

علی ظفر نے عمر کوٹ کی رہائشی گلوکارہ نرملا کا گیت ریلیز کردیا جس کی ویڈیو اور میوزک اے آئی سے ترتیب دیا گیا ہے۔

 بین الاقوامی شہرت یافتہ پاکستانی گلوکار علی ظفر نے سندھ کے دور افتادہ علاقے تھرپارکر کے ٹیلنٹ کو دنیا تک پہنچادیا۔

 علی ظفر نے اپنے لیبل لائٹنگیل ریکارڈز کے تحت تھرپارکر سے تعلق رکھنے والی گلوکارہ نرملا کے پہلے گانے "رنگ رسیا" کو ریلیز کرکے تمام رکاوٹیں توڑدی ہیں۔ گیت کو علی ظفر کی جانب سے پروڈیوس اور ڈائریکٹ کیا گیا ہے۔ گانے کی ویڈیو بنانے میں پاکستان میں پہلی بار اے آئی ٹیکنالوجی کا استعمال کیا گیا ہے۔

علی ظفر نے ایک حالیہ انسٹاگرام پوسٹ میں لکھا کہ ، "کچھ سال پہلے، مجھے یوسف صلاح الدین کی طرف سے واٹس ایپ پر ایک گانے کا ڈیمو موصول ہوا، جس میں نرملا سے میرا تعارف کرایا گیا۔" 

انہوں نے لکھا کہ "میں فوری طور پر اس کی آواز اور کمپوزیشن کی مہارت سے متاثر ہو گیا۔ صحرا میں رہنے کے باوجود جہاں بنیادی ضروریات جیسے پانی کی قلت ہے اور جہاں معاشرتی اصول خواتین کو موسیقی کی پیروی کرنے سے روکتے ہیں، نرملا کا جذبہ غیر متزلزل رہا۔ اس کے عزم نے مجھے گانے کی ریکارڈنگ، پروڈکشن اور ریلیز کا وعدہ کرنے پر مجبور کیا، ایک بار جب ہم نے گانا مکمل کیا،''۔

انہوں نے لکھا کہ میں جانتا تھا کہ ہمیں اس کی ویڈیو کے لیے واقعی کچھ خاص بنانا ہے۔علی ظفر نے بلاول بھٹو کو ایکس پر ٹیگ کرتے ہوئے اس بات پر زور دیا کہ وہ نرملا جیسی نوجوان لڑکیوں کو بغیر کسی خوف کے اپنے خوابوں کو پورا کرنے میں مدد کریں، خاص طور پر سندھ کے دور دراز علاقوں میں۔

نرملا کا سفر امید کی ایک طاقتور علامت کے طور پر کھڑا ہے۔ متعدد چیلنجوں کا سامنا کرنے کے باوجود، بشمول مالی مشکلات، موسیقی کی رسمی تربیت تک رسائی کا فقدان، اور کمیونٹی کی مزاحمت جہاں گانے گانا ناپسندیدہ ہے، خاص طور پر خواتین کے لیے، نرملا کا غیر متزلزل جذبہ اس شاندار میوزک ویڈیو کی تخلیق کا باعث بنا ہے۔

گانے کی ریلیز پر گلوکارہ نرملا نے اپنی خوشی کا اظہار کرتے ہوئے کہا کہ میں بیان نہیں کر سکتا کہ میں کتنی خوش ہوں، تمام تعاون کے لیے علی بھائی کی بہت مشکور ہوں۔

لائٹنگیل ریکارڈز کی جانب سے جاری کردہ یہ ویڈیو پاکستان میں موسیقی اور آرٹ کے مستقبل کی جانب ایک اہم قدم ہے۔ اے ائی میوزک ویڈیو بنا کر علی ظفر نے ایک انوکھا اور مسحور کن تجربہ تیار کیا ہے جو تخلیقی صلاحیتوں کی حدود کو آگے بڑھاتا ہے۔