بھارت میں عابدہ پروین کا انسٹاگرام اکاؤنٹ بلاک

لاہور : پاکستان کی ممتاز صوفی گلوکارہ عابدہ پروین کا انسٹاگرام اکاؤنٹ بھارت میں بلاک کر دیا گیا ہے۔

گلوکارہ عابدہ پروین کے بھارتی مداح جب ان کا انسٹاگرام پروفائل دیکھنے کی کوشش کرتے ہیں تو ایک نوٹس ظاہر ہوتا ہے جس میں کہا گیا ہے کہ یہ اکاؤنٹ قانونی درخواست کے تحت بھارت میں دستیاب نہیں ہے۔

تاہم اگر بھارتی صارفین وی پی این کا استعمال کریں تو بلاک فنکاروں کے اکانٹس تک رسائی ممکن ہوجاتی ہے۔

واضح رہے کہ یہ اقدام بھارت میں حالیہ پہلگام حملے کے بعد پاکستان اور پاکستان کے عوام خاص طور پر اہم اور مشہور شخصیات کیخلاف بڑھتی ہوئی پابندیوں کا نتیجہ ہے۔

 اس سے قبل کئی مشہور پاکستانی شخصیات کے سوشل میڈیا اکانٹس کو بلاک کیا جاچکا ہے۔یاد رہے کہ عابدہ پروین کے بھارت سمیت دنیا کے کئی ممالک میں بڑی تعداد میں مداح موجود ہیں جو بھارت کے اس اقدام کی سختی سے مذمت کر رہے ہیں۔