بوتل کیس، ملازم پر تشدد کے بعد راحت فتح علی کو زیادہ عزت دینی چاہیے، ریشم

پاکستانی اداکارہ ریشم نے راحت فتح علی خان پر تنقید کرنے والوں کو آڑے ہاتھوں لیتے ہوئے کہا ہے کہ اس واقعے اور معافی کے بعد اُن کی نظر میں معروف قوال کی عزت مزید بڑھ گئی ہے۔

انہوں نے کہا کہ بوتل کیس میں راحت فتح علی خان نے ملازم پر تشدد کے بعد اپنی غلطی پر نہ صرف ملازم بلکہ پوری قوم سے معافی مانگی تھی۔

انہوں نے کہا کہ راحت فتح علی نے عالمی سطح پر پاکستان کا نام روشن کیا اور ملک کی عزت بڑھائی البتہ گزشتہ دنوں راحت فتح علی خان سے ایک غلطی ہوگئی تھی جس پر اُنہوں نے سب سے پہلے اللہ تعالیٰ سے معافی مانگی، پھر اپنے ملازم سے اور پوری قوم سے معافی مانگی۔

اداکارہ نے کہا کہ راحت فتح علی خان کی معافی کے بعد میری نظر میں اُن کے لیے عزت بہت بڑھ گئی ہے کیونکہ بہت ہی کم لوگ اپنی غلطی تسلیم کرتے ہیں۔ اُنہوں نے مزید کہا کہ اس واقعے کے بعد، اب ہمیں راحت فتح علی خان کو پہلے سے زیادہ عزت اور پیار دینا چاہیے۔