فراڈ کا کیس، عاطف خان نے اہلیہ نادیہ حسین اور دیگر کے اکاؤنٹس میں 3 کروڑ سے زائد رقم منتقل کی

کرپشن کے کیس میں گرفتار معروف پاکستانی ماڈل نادیہ حسین کے شوہر اور نجی سیکیورٹیز کمپنی کے سی ای او عاطف خان نے اپنی اہلیہ کے علاوہ دیگر پانچ افراد کے اکاؤنٹس میں بھی تین کروڑ سے زائد کی رقم منتقل کی۔

تفصیلات کے مطابق بینک الفلاح سیکورٹیز کے سابق سی ای اوعاطف خان کے مبینہ فراڈ کے حوالے سے مذید انکشافات ہوئے ہیں۔

مالی فراڈ اورمالی بے ضابطگیوں کا انکشاف ایف آئی اے کے عبوری چالان میں کیا گیا۔ جس کے مطابق عاطف خان نے اپنی اہلیہ نادیہ حسین کے علاوہ دیگر پانچ افرادکے اکاونٹس میں بھی 3کروڑ روپے سے زائد منتقل کئے۔

چالان کے مطابق عاطف خان نے قوانین کے خلاف کمپنی فنڈزسے خریدے گئے شئیرزکی مد میں 3 کروڑ 14 لاکھ سے زائد کا منافع حاصل کیا۔

اپنی مدت ملازمت میں کمپنی سے پرسنل ٹریڈنگ کی مد میں ایک ارب سے زائد کی رقم حاصل کی،مذکورہ رقم کی مد میں عاطف خان نے 539 ملین روپے تاحال کمپنی کو ادا نہیں کئے۔

چالان کے مطابق کمپنی کے سابق سی ایف او فیصل شیخ اور امتیاز چنہ نے عاطف خان کی مبینہ فراڈ اورمالی بے ضابطگیوں کوچھپانے میں مدد کی۔