صدارتی ایوارڈ یافتہ شہنائی نواز استاد عبداللہ چل بسے

جامشورو: صدارتی ایوارڈ یافتہ شہنائی نواز استاد عبداللہ 72 سال کی عمرمیں فانی دنیا کو خیر باد کہہ گئے۔

تفصیلات کے مطابق خاندانی ذرائع کا کہنا ہے کہ شہنائی نواز استاد عبداللہ طویل عرصے سے پھیپھڑوں اور دمے کے عارضے میں مبتلا تھے، ان کی نمازِ جنازہ آج کوٹری میں ادا کی جائے گی۔

رپورٹس کے مطابق مرحوم استاد عبداللہ کی تدفین آبائی قبرستان سید بڈھل شاہ میں کی جائے گی، استاد عبداللہ برصغیر میں شہنائی کے عالمی شہرت یافتہ فنکار تھے، انہوں نے کئی دہائیوں تک شہنائی کے فن سے اپنی پہچان بنائی رکھی۔

پاکستان،بھارت اور بنگلادیش میں استاد عبداللہ کی شہنائی کو غیرمعمولی پذیرائی ملی، انہوں نے کئی قومی و عالمی ثقافتی میلوں میں اپنے فن کا لوہا منوایا۔