ملک میں 44 ہزار والدین بچوں کو پولیو کے قطرے پلوانے سے انکاری، 34 ہزار کراچی سے

وفاقی وزیر صحت مصطفیٰ کمال نے انکشاف کیا ہے کہ  ملک بھر میں پولیو ویکسین سے انکار کرنے والے والدین کی کُل تعداد 44 ہزار ہے جس میں سے 34 ہزار والدین کراچی کے ہیں۔

 پولیو ایمرجنسی آپریشن سینٹر کراچی میں گفتگو کرتے ہوئے  مصطفیٰ کمال کا کہنا تھا کہ34 ہزار میں 27 ہزار والدین کا تعلق کراچی کے ضلع شرقی سے ہے۔

انہوں نے کہا کہ آپشن موجود ہےکہ جو پولیو ویکسین پلانے سے انکار کرے اس کے خلاف مقدمہ درج کرائیں لیکن میں ذاتی طور پر پولیس کارروائی کے حق میں نہیں ہیں۔

مصطفیٰ کمال نے والدین سے اپیل کی کہ پولیو  ویکسین کے خلاف منفی پروپیگنڈے  پر کان نہ دھریں، پولیو ویکسین نہ پلانے والا معاشرے کا دشمن ہے۔

وزیر صحت نے کہا کہ بالخصوص ضلع شرقی میں ہمارے اراکین اسمبلی پولیو ٹیموں کے ساتھ گھروں پر جاکر والدین کو قائل کریں گے کہ وہ اپنے بچوں کو قطرے لازمی پلوائیں۔