سندھی ثقافت کا دن کب سے منایا جارہا ہے؟

سندھ سمیت دنیا بھر میں آج سندھی ثقافت کا دن منایا جارہا ہے، جس کا مقصد عالمی سطح پر سندھی ثقافت، اس کی تعریف کو عالمی سطح پر روشناس کرانا ہے۔

سندھی ثقافت کا دن ہر سال دسمبر کے پہلے ہفتے میں پڑنے والے اتوار کو منایا جاتا ہے جس کا آغاز سال 2010 سے ہوا۔

اس کا آغاز کیسے ہوا ؟ آئیے ہم آپ کو بتاتے ہیں

سنہ 2010 میں آصف علی زرداری پاکستان کے صدر تھے اور وہ دنیا بھر کے دوروں کے موقع پر سندھی ٹوپی لگا کر جاتے ، عالمی رہنماؤں سے ملاقاتیں کرتے تھے۔

آصف زرداری کی یہ ادا سندھ کے رہنے والوں کو تو پسند آئی البتہ ایک معروف تجزیہ نگار ڈاکٹر شاہد مسعود نے اس حوالے سے ایک تنقیدی پروگرام کیا اور سندھی ٹوپی کو بدمعاشی سے تشبیہ دی۔

شاہد مسعود کے اس پروگرام پر انہیں سندھ کے باسیوں بالخصوص ایکٹویسٹ و سیاسی کارکنان کی جانب سے شدید تنقید کا نشانہ بنایا گیا اور اس پر زبردست مہم بھی چلی۔

بعد ازاں نجی سندھی ٹی وی کے مالک نے ڈاکٹر شاہد مسعود کو جواب دینے اور سندھی ثقافت سے دنیا کو روشناس کرانے کیلیے سندھی ثقافتی دن منانے کا اعلان کیا، ابتدائی سالوں میں یہ ہر جماعت اور گروہ علیحدہ تاریخ پر اس دن کو مناتا تھا تاہم بعد میں مشترکہ فیصلہ یہ ہوا کہ دسمبر کے پہلے اتوار کو تمام جماعتیں، برادریاں سندھی ثقافت کا دن منائیں گی۔

اس دن کو اب سندھی عوام عید بھی کہتے ہیں اور ثقافتی دن کے حوالے بھرپور تیاریاں بھی کرتے ہیں۔ ثقافتی دن کے لیے خاص لباس، ٹوپی اور اجرک تیار کی جاتی ہے۔

اس دن کو دنیا بھر میں بسنے والے سندھی شیان شان طریقے سے مناتے ہیں، جبکہ کراچی سمیت سندھ بھر میں ریلیاں، جلسے اور جلوس منعقد کیے جاتے ہیں، اس کے علاوہ گورنر ہاؤس کے قریب پریس کلب چورنگی پر صبح سے شام تک رنگا رنگ پروگرام جاری رہتا ہے۔

اس پروگرام میں سندھی فنکار اپنے فن کا مظاہرہ کرتے ہیں اور پھر سورج ڈھلتے ہی سب اپنے اپنے گھروں کو چلے جاتے ہیں۔ سارا دن شاہراہوں ، گلیوں اور محلوں میں نوجوان اور بچے سندھی گیتوں پر دیوانہ وار رقص کرتے نظر آتے ہیں۔

سیاسی قائدین کی جانب سے بھی اس دن کی مناسبت سے عوام کیلیے مبارک باد کے پیغامات بھیجے جاتے ہیں جبکہ پروگرامز کا خصوصی انعقاد ہوتا ہے۔