علی امین گنڈا پور کو گرفتار کرنے کا حکم، ناقابل ضمانت وارنٹ جاری

لاہور کی انسداد دہشت گردی کی عدالت نے توڑ پھوڑ کیس میں وزیراعلیٰ خیبرپختونخوا علی امین گنڈا پور کے ناقابل ضمانت وارنٹ گرفتاری جاری کردیے۔

انسداد دہشت گردی عدالت لاہور  نے تھانہ مناواں میں درج توڑ پھوڑ کے مقدمے میں علی امین گنڈا پور کے وارنٹ جاری کیے اور انہیں گرفتار کر کے پیش کرنے کی ہدایت کی ہے۔

واضح رہے کہ کاہنہ جلسے کے دوران وزیراعلیٰ کا خیبرپختونخوا سے آنے والا قافلہ جب مناواں پہنچا تھا تو وہاں پر راستے بند تھے جس پر علی امین گنڈا پور نے گاڑی سے اتر کر کلاشنکوف کے بٹ مار کر گاڑی کے شیشے توڑے اور پھر ٹرک کو پیچھے کروایا تھا۔

علی امین گنڈا پور کے خلاف لاہور کے تھانہ مناواں میں ستمبر میں مقدمہ درج کیا گیا  تھا جس میں انسداد دہشت گردی ایکٹ، اقدام قتل سمیت 13 دفعات لگائی گئی تھیں۔