عمر ایوب اور شبلی فراز کی نااہلی کے بعد عمران خان کی نئی حکمت عملی

عمران خان نے قومی اسمبلی اور سینیٹ میں اپوزیشن لیڈرز کی نااہلی کے بعد نئی حکمت عملی بنالی ہے۔

ایکسپریس نیوز کے مطابق پاکستان تحریک انصاف (پی ٹی آئی) نے محمود خان اچکزئی کو قومی اسمبلی میں اور اعظم سواتی کو سینیٹ میں قائد حزب اختلاف کے عہدوں کے لیے نامزد کر دیا ہے۔

پارٹی کے ترجمان سلمان اکرم راجہ نے بتایا کہ پی ٹی آئی کے بانی عمران خان نے اچکزئی اور سواتی کو پارلیمنٹ کے دونوں ایوانوں میں یہ اہم ذمہ داریاں سونپی ہیں۔

ترجمان نے یہ بھی بتایا کہ آئندہ ضمنی انتخابات کے حوالے سے مشاورت ایک اعلیٰ سطحی پارٹی اجلاس میں ہوگی، جس کے حتمی فیصلے اس کی سیاسی کمیٹی کرے گی۔

اس حوالے سے پی ٹی آئی نے سیکریٹریٹ کو تحریری طور پر آگاہ کردیا ہے۔

قائد حزب اختلاف کا عہدہ کھونے کے ساتھ ساتھ، عمر ایوب کو پبلک اکاؤنٹس کمیٹی اور دیگر پارلیمانی کمیٹیوں سے بھی ہٹا دیا گیا تھا۔

اس کے بعد، الیکشن کمیشن آف پاکستان (ای سی پی) نے عمر ایوب اور شبلی فراز کی نااہلی کے نوٹیفکیشن جاری کیے، جسے دونوں نے پشاور ہائی کورٹ میں چیلنج کر رکھا ہے۔

مزید برآں، پی ٹی آئی کے سات نااہل ہونے والے اراکین کو 15 مختلف قائمہ کمیٹیوں سے بھی ہٹا دیا گیا ہے۔ ان میں صاحبزادہ حمید رضا کو انسانی حقوق کمیٹی کی چیئرمین شپ سے، زرتاج گل کو اسی کمیٹی کی رکنیت سے، اور رائے حسن نواز کو ریلوے کمیٹی کی چیئرمین شپ سے ہٹا دیا گیا ہے۔