عمران خان آنکھ کے انفیکشن اور دانتوں کے درد میں مبتلا ہیں، شیر افضل مروت کا دعویٰ

پاکستان تحریک انصاف (پی ٹی آئی) کے سینئر نائب صدر شیر افضل خان مروت نے دعویٰ کیا ہے کہ پارٹی کے بانی عمران خان کو ''بنیادی طبی ضروریات سے محروم رکھا جا رہا ہے، وہ اڈیالہ جیل میں آنکھ کے انفیکشن اور دانتوں میں شدید درد میں مبتلا ہیں۔ 

مائیکروبلاگنگ سائٹ X پر ایک پوسٹ میں، پی ٹی آئی کے سینئر نائب صدر نے پارٹی رہنماؤں پر زور دیا کہ عمران خان کی حراست اور تمام سیاسی قیدیوں کی قید کے خلاف احتجاج کے لیے 10 مارچ (اتوار) کو عوام کو سڑکوں پر لائیں۔

انہوں نے کہا کہ ہمارا مطالبہ ہے کہ ان سب کو رہا کیا جائے اور عوامی مینڈیٹ ان لوگوں کو واپس کیا جائے جن کو انہوں نے ووٹ دیا تھا! 

شیر افضل خان مروت نے قوم سے پاکستان میں ہونے والی مبینہ سنگین خلاف ورزی کے خلاف اٹھ کھڑے ہونے کا بھی مطالبہ کیا۔

انہوں نے کہا کہ آپ کو اپنی طاقت کو سمجھنا چاہیے،اگر آپ سب مل کر نکلیں تو کوئی آپ کو نقصان نہیں پہنچا سکتا۔ 

ایک روز قبل پی ٹی آئی نے قومی اسمبلی میں قرارداد جمع کرائی تھی جس میں عمران خان سمیت  دیگر سیاسی رہنماؤں اور کارکنوں اور سینئر صحافیوں عمران ریاض خان اور اسد طور کی رہائی کا مطالبہ کیا گیا تھا۔

قرارداد میں سابق حکمراں جماعت نے مطالبہ کیا کہ ”مسلم امہ“ کے قائد کے خلاف تمام غیر قانونی مقدمات کو فوری طور پر ختم کیا جائے۔