آرمی چیف کا سی ایم ایچ راولپنڈی کا دورہ، معرکہ حق کے زخمیوں کی عیادت

راولپنڈی: آرمی چیف جنرل سید عاصم منیر نے سی ایم ایچ راولپنڈی کا دورہ کیا اور معرکہ حق و آپریشن بنیان مرصوص کے دوران زخمی ہونے والے فوجی جوانوں اور معصوم شہریوں کی عیادت کی

 آئی ایس پی آر کے مطابق آرمی چیف جنرل سید عاصم منیر کا اس موقع پر کہنا تھا کہ معرکہ حق و آپریشن بنیان مرصوص کے دوران پاکستانی عوام کی ثابت قدمی، عزم اور متحد ردعمل کا مظاہرہ ملکی عسکری تاریخ کا ایک اہم باب ہے۔

آرمی چیف جنرل سید عاصم منیر نے زخمی اہلکاروں سے ملاقات کی، اور ان کی غیر معمولی جذبے، بہادری اور فرض شناسی کی تعریف کی، اور ان کی مکمل دیکھ بھال، بحالی اور بہبود کے لئے پاکستان کی مسلح افواج کے غیر متزلزل عزم کا اعادہ کیا۔

 اس موقع پر آرمی چیف جنرل سید عاصم منیر نے کہا کہ ہمارے شہریوں اور فوجیوں کی بہادری اور قربانیاں پاکستان کی سلامتی کی بنیاد ہیں، پوری قوم اپنی مسلح افواج کے ہر رکن کے ساتھ مکمل یکجہتی کے ساتھ کھڑی ہے۔

 آرمی چیف جنرل سید عاصم منیر نے اس بات پر زور دیا کہ دشمن کا کوئی بھی منصوبہ اور سازش پاکستان کی مسلح افواج کے عزم کو ختم نہیں کر سکتی۔

 انہوں نے کہا کہ معرکہ حق و آپریشن بنیان مرصوص کے دوران پاکستانی عوام کی ثابت قدم حمایت کو سراہتے ہوئے کہا کہ جس عزم اور متحد ردعمل کا مظاہرہ کیا گیا، وہ ملک کی عسکری تاریخ کا ایک اہم باب ہے۔