بھارت نے جنگ کو بڑھاوا دیا تو نیوکلیئر جنگ ہوسکتی ہے، وزیر دفاع

اسلام آباد: وزیردفاع خواجہ آصف نے کہا ہے کہ اگر بھارت نے جنگ کو بڑھاوا دیا تو نیوکلیئر  جنگ ہوسکتی ہے۔

نجی چینل سے گفتگو کے دوران بات کرتے ہوئے وزیر دفاع خواجہ آصف کا کہنا تھا کہ نیوکلیئر جنگ کی صورت میں ساری ذمہ داری بھارت پر عائد ہوگی۔

خیال رہے کہ گزشتہ شب بھارت کی جانب سے رات کی تاریکی میں بزدلانہ حملے کے بعد پاکستان نے بھرپور جوابی کارروائی کرتے ہوئے بھارت کے 5 طیارے مار گرائے اور بھارتی فوج کا بریگیڈ ہیڈ کوارٹر بھی تباہ کردیا۔

پاکستانی فضائیہ اور بری افواج نے کئی بھارتی چیک پوسٹوں کو بھی تباہ کیا جس کی ویڈیوز ڈی جی آئی ایس پی آر نے میڈیا سے شیئر کیں۔

پاک فوج کو آج قومی سلامتی کمیٹی نے بھارتی جارحیت کا بھرپور جواب دینے کا اختیار دے دیا ہے۔

اعلامیے میں کہا گیا ہے کہ اقوام متحدہ کے چارٹر کے آرٹیکل 51 کے تحت، پاکستان کو اپنے دفاع میں جواب دینے کا حق حاصل ہے، اور پاکستان کسی بھی وقت، جگہ اور طریقے سے اپنے معصوم شہریوں کی شہادت اور خودمختاری کی کھلی خلاف ورزی کا بدلہ لینیکا حق محفوظ رکھتا ہے اور پاکستان کی مسلح افواج کو اس ضمن میں مناسب کارروائی کے مکمل اختیارات دے دییگئے ہیں۔