بہاولنگر واقعے پر عمران خان نے خاموشی توڑ دی

پاکستان تحریک انصاف کے بانی چیئرمین عمران خان نے بہاولنگر میں پیش آنے والے واقعے پر تشویش کا اظہار کرتے ہوئے کہا ہے کہ ملک میں سب کے لیے قانون ایک برابر ہونا چاہیے۔

اڈیالہ جیل راولپنڈی میں چیئرمین پی ٹی آئی بیرسٹر گوہر خان اور شیر افضل مروت سمیت دیگر رہنماؤں نے بانی پی ٹی آئی سے ملاقات کی۔ جس کے بعد جیل کے باہر بعد میڈیا سے گفتگو کرتے ہوئے کہا کہ بانی پی ٹی آئی نے بہاولنگر واقعے کی شدید مذمت کرتے ہوئے تشویش کا اظہار کیا۔ 

رہنما پی ٹی آئی نے کہا کہ بانی پی ٹی آئی نے کہا ملک میں سب کیلئے قانون برابر ہونا چاہیے، ایک ملک میں دو قانون نہیں چل سکتے۔

چیئرمین پی ٹی آئی کا کہنا تھا کہ بانی پی ٹی آئی نے مجھے اور عمر ایوب کو ذمہ داری سونپی ہے پنجاب میں پارٹی کو متحرک کریں، اس سلسلے میں جلد تحریک انصاف پنجاب سمیت ملک بھر میں جلسوں کا شیڈول جاری کرے گی اور ہمارے سب سے زیادہ جلسے پنجاب میں ہوں گے۔

انہوں نے بتایا کہ بانی پی ٹی آئی سے آج ایسے کمرے میں ملاقات کروائی گئی جس میں درمیان میں شیشے تھے، ہم ملاقات میں رکاوٹیں کھڑٰ کرنے کی مذمت کرتے ہیں کیونکہ یہ اقدام خلاف قانون ہے۔