بلٹ ٹرین چلانے کا منصوبہ، کراچی تا لاہور سفر 5 گھنٹے میں ممکن ہوگا

اسلام آباد: پاکستان ریلوے نے ایک بڑے منصوبے کا اعلان کیا ہے جس کے تحت لاہور اور کراچی کے درمیان بلٹ ٹرین چلائی جائے گی۔ 

اس منصوبے کا مقصد 20 گھنٹے کے طویل سفر کو کم کر کے صرف 5 گھنٹے میں مکمل کرنا ہے۔ ریڈیو پاکستان کے مطابق، اس تیز رفتار بلٹ ٹرین کو 2030 تک فعال کرنے کا ہدف ہے۔

یہ منصوبہ چین پاکستان اقتصادی راہداری (CPEC) کے تحت 6.8 ارب ڈالر مالیت کے ایم ایل-1 اپ گریڈ منصوبے کا حصہ ہے۔ 

وزیر ریلوے حنیف عباسی نے بتایا کہ اس منصوبے کو چین کی معاونت سے چائنا ریلوے کنسٹرکشن کارپوریشن کی مدد سے مکمل کیا جائے گا۔

بلٹ ٹرین کی زیادہ سے زیادہ رفتار 250 کلومیٹر فی گھنٹہ ہوگی۔

یہ 1215 کلومیٹر طویل ریل لائن حیدرآباد، ملتان اور ساہیوال جیسے اہم شہروں سے گزرے گی۔

منصوبے میں نئی دہری پٹڑیوں کی تنصیب، پرانے پلوں کی تعمیر نو اور جدید سگنلنگ سسٹم شامل ہے۔

حکام کے مطابق، اس منصوبے سے نہ صرف عوام کو تیز رفتار اور آرام دہ سفر کی سہولت ملے گی بلکہ اس سے ہزاروں ملازمتوں کے مواقع بھی پیدا ہوں گے۔ 

اس کے علاوہ، ریلوے کے ذریعے مال برداری کی موجودہ شرح 4 فیصد سے بڑھا کر 20 فیصد تک کی جائے گی، جس سے ایندھن پر ہونے والے اربوں روپے کے اخراجات میں بچت ہو گی۔

اس سے قبل، وزیراعلیٰ پنجاب مریم نواز شریف نے لاہور اور راولپنڈی کے درمیان بلٹ ٹرین منصوبے کی بھی منظوری دی ہے، جس سے ان دو شہروں کے درمیان سفر کا دورانیہ صرف 2.5 گھنٹے کا رہ جائے گا۔