بشری بی بی 24 نومبر کے احتجاج کو کامیاب بنانے کیلیے متحرک ہوگئیں

پاکستان تحریک انصاف کے بانی چیئرمین عمران خان کی اہلیہ اور سابق خاتون اول بشریٰ بی بی 24 نومبر کے احتجاج کے حوالے سے متحرک ہوگئی ہیں۔

تفصیلات کے مطابق سابق خاتون اول اور بانی پی ٹی آئی کی اہلیہ بشریٰ بی بی نے 24 نومبر کے احتجاج کو کامیاب بنانے کے حوالے سے تحریک انصاف کے عہدیداران کو ہدایات جاری کرنا شروع کردی ہیں۔

اطلاعات ہیں کہ سابق خاتون اول بشریٰ بی بی کی زیر صدارت وزیراعلٰی ہاؤس پشاور میں تحریک انصاف کے ہزارہ اور مالاکنڈ ارکان اسمبلی کا اجلاس ہوا، جس میں وزیراعلیٰ گنڈا پور اور پارٹی عہدیداران نے بھی شرکت کی۔

اجلاس میں 24 نومبر کے احتجاج کے حوالے سے حکمت عملی پر غور کیا گیا۔ بشریٰ بی بی نے شرکا کو عمران خان کی ہدایت سے آگاہ کیا اور ساتھ میں وضاحت کی کہ لیڈر عمران خان ہیں مجھے صرف پیغام آگے پہنچانے کیلیے آگے آنا پڑا ہے۔

انہوں نے کہا کہ عمران خان کی ہدایت ہے کہ پارلیمنٹ، قانون اور آئین کی بالادستی کیلیے 24 نومبر کو سب کو نکلنا ہوگا۔ اجلاس میں وزیراعلٰی خیبر پختونخوا بھی موجود تھے جنہوں نے کا ارکان کو 24 نومبر احتجاج کے حوالے سے ہدایات جاری کیں۔