چیئرمین ایف بی آر کا ہر صورت 6 ارب روپے کی گاڑیاں خریدنے کا اعلان

فیڈرل بورڈ آف ریونیو کے چیئرمین راشد لنگڑیال افسران کیلیے گاڑیاں خریدنے کے فیصلے پر ڈٹ گئے اور انہوں نے قائمہ کمیٹی کے اعتراض کو ردی کی ٹوکری میں پھینک دیا۔

کراچی میں گفتگو کرتے ہوئے چیئرمین ایف بی آر راشد لنگڑیال نے افسران کے لیے گاڑیوں کی خریداری پر وضاحت کرتے ہوئے کہا کہ نوجوان افسران کے لیے ہر صورت گاڑیاں خریدی جائیں گی کیونکہ آپریشنز اور سیلز ٹیکس چیکنگ کے لیے افسر کا وزٹ ضروری ہوتا ہے۔ انہوں نے کہا کہ کمیٹی کے اعتراض کا احترام سے شافی جواب دیا ہے۔

راشد لنگڑیال کا کہنا ہے کہ ٹیکس اہداف پورے کریں گے، کراچی میں بڑی کمپنیز کے ہیڈ کوارٹرز ہیں، یہاں ملٹی نیشنلز کے بھی ہیڈ کوارٹرز ہیں، ٹیکس کلیکشن کا عمل اُدھر سے ریکارڈ میں آتا ہے۔

کراچی سے زائد ٹیکس آنے لیکن رقم نہ لگنے پر ایف بی آر چیئرمین سے سوال کیا گیا جس کا انہوں نے جواب دیا کہ یہ معاملہ مالی، فیڈرل ازم اور آئین میں طے ہے۔ چیئرمین ایف بی آر کا کہنا ہے کہ ٹریکنگ سسٹم ٹرک کے ساتھ گاڑیوں میں بھی 2 سے 3 مہینے میں نصب ہو جائے گا۔

واضح رہے کہ 4 روز قبل سینیٹ قائمہ کمیٹی خزانہ نے ایف بی آر کو 6 ارب روپے کی ایک ہزار گاڑیوں کی خریداری روکنے کی ہدایت کی تھی، رکن کمیٹی فیصل واوٴڈا نے کہا تھا کہ 386 ارب روپے کا ٹیکس شارٹ فال ہے پہلے اسے ختم کریں، اگر گاڑیاں خریدی گئیں تو میں اس کے خلاف نیب میں جاوٴں گا۔