فاروق ستار کا میئر کراچی کے استعفی کا مطالبہ

متحدہ قومی موومنٹ-پاکستان (MQM-P) کے سینئر رہنما ڈاکٹر فاروق ستار نے میئر کراچی مرتضیٰ وہاب سے استعفے کا مطالبہ کرتے ہوئے شہر کی انتظامیہ کو شدید بارشوں کے بعد پانی نکالنے میں ناکامی کا ذمہ دار ٹھہرایا ہے۔

پیر کی رات سُرجانی ٹاؤن کے دورے کے دوران فاروق ستار نے کراچی کی سڑکوں کی حالت پر مایوسی کا اظہار کرتے ہوئے کہا کہ "مقامی نمائندوں کے دعوے بارش میں بہہ گئے ہیں۔"

انہوں نے میئر پر تنقید کرتے ہوئے کہا: "ہم تنخواہیں اور مراعات تو برداشت کر سکتے ہیں، لیکن اس میئر کا بوجھ نہیں اٹھا سکتے۔"

فاروق ستار نے پاکستان پیپلز پارٹی (PPP)، جماعت اسلامی اور پاکستان تحریک انصاف (PTI) جیسی بڑی سیاسی جماعتوں پر بھی کراچی کی بارش سے پیدا ہونے والی ہنگامی صورتحال کو نظر انداز کرنے کا الزام لگایا اور سوال کیا کہ مون سون سے پہلے کتنے نالے صاف کیے گئے تھے۔