فیلڈ مارشل نے بھارت کی ہائبرڈ سازشوں کو پھر سے بے نقاب کردیا

کوئٹہ: فیلڈ مارشل سید عاصم منیر نے اس بات پر زور دیا ہے کہ بلوچستان کی ترقی پاکستان کی قومی یکجہتی اور استحکام کی ضمانت ہے۔

انہوں نے یہ بات نیشنل ورکشاپ بلوچستان کے 16ویں اجلاس کے شرکاء سے ملاقات کے دوران کہی۔ اس موقع پر انہوں نے بھارت کو ''معرک? حق'' میں شکست خوردہ قرار دیتے ہوئے الزام لگایا کہ اب وہ ''فتنہ الخوارج'' اور ''فتنہ الہندوستان'' جیسے پراکسیز کے ذریعے پاکستان کے خلاف ہائبرڈ وار میں ملوث ہے۔

فیلڈ مارشل منیر نے واضح کیا کہ یہ تمام ''فتنہ باز عناصر'' اپنے انجام سے دوچار ہوں گے، جیسا کہ انہیں ''معرکہ حق'' میں شکست ہوئی تھی۔

انہوں نے دہشت گردی کے خلاف پاک فوج کے عزم کا اعادہ کرتے ہوئے کہا کہ جب تک اس لعنت کا مکمل خاتمہ نہیں ہو جاتا، جدوجہد جاری رہے گی۔

آرمی چیف نے بھارت کی جانب سے دہشت گرد گروہوں کی سرپرستی کے الزام کو سختی سے مسترد کرتے ہوئے اسے پاکستان کے محب وطن عوام، خاص طور پر بلوچ عوام کی حب الوطنی کو کمزور کرنے کی ایک ناکام کوشش قرار دیا۔

 انہوں نے اس بات پر زور دیا کہ دہشت گردی کا کوئی مذہب، فرقہ یا نسل نہیں ہوتی، اور اس کے خلاف پوری قوم کو متحد ہو کر ایک آواز بننا چاہیے اور اجتماعی قومی عزم کے بغیر دہشت گردی جیسے خطرے سے نمٹنا ممکن نہیں۔

فیلڈ مارشل منیر نے بلوچستان میں جاری ترقیاتی منصوبوں کی اہمیت کو اجاگر کیا اور صوبے کی ترقی کے لیے بین الاقوامی اداروں کے تعاون کو مزید بہتر بنانے اور مشترکہ قومی حکمت عملی اپنانے پر زور دیا۔ انہوں نے علاقائی امن کے لیے پاکستان کے پختہ عزم کا بھی اعادہ کیا۔

آرمی چیف نے واضح کیا کہ مادرِ وطن کو درپیش کسی بھی اندرونی یا بیرونی خطرے کا منہ توڑ جواب دیا جائے گا، اور قومی وقار اور عوام کے تحفظ کو ہر صورت یقینی بنایا جائے گا۔ آئی ایس پی آر کے مطابق، نشست کا اختتام آرمی چیف اور شرکاء کے درمیان ایک آزادانہ اور بھرپور سوال و جواب کے سیشن پر ہوا۔