جنوبی ایشیا میں ایٹمی جنگ چھڑ سکتی ہے، جنرل ساحر شمشاد

چیئرمین جوائنٹ چیف آف اسٹاف کمیٹی جنرل شمشاد مرزا نے کہا ہے کہ پاکستان اور بھارت کے درمیان کشیدگی کی اصل وجہ مسئلہ کشمیر ہے اور اس کے حل کی ضرورت ہے ورنہ جنوبی ایشیا میں نیوکلیئر تصادم کا خطرہ موجود رہے گا۔

چیئرمین جوائنٹ چیف آف اسٹاف کمیٹی نے 22ویں شنگریلا ڈائیلاگ 2025 میں پاک بھارت کشیدگی کے حوالے سے تفصیلی موقف پیش کیا اور ایک بار پھر بھارت کو بات چیت پر آنے کی دعوت دی۔

انہوں نے کہا کہ پاکستان کشمیر سمیت تمام مسائل کا حل بات چیت اور اقوام متحدہ کی قراردادوں کی روشنی میں چاہتا ہے تاہم اگر کوئی جارحیت ہوئی تو پھر اس کا دفاع بھی ہم پر لازم ہوگا۔

جنرل شمشاد مرزا نے بھارت کی جانب سے پانی کو بطور ہتھیار استعمال کرنے کو بین الاقوامی قوانین کی کھلی خلاف ورزی قرار دیا۔ انہوں نے کہاکہ ایشیا پیسیفک عالمی طاقت کا مرکز بن چکا اور جنوبی ایشیا کی سلامتی کے لیے مذاکرات ناگزیر ہیں، تنازع سے بچاؤ، بحران کے بعد کی کوششوں سے بہتر ہے۔