کراچی کا جرمن قونصل خانہ بند، صرف یورپی شہریوں کو سہولیات دی جائیں گی

کراچی میں قائم جرمن قونصل خانے کو غیر یورپی شہریوں کے لیے تا حکم ثانی بند کر دیا گیا۔

قونصل خانے کے ترجمان کی جانب سے جاری اعلامیے میں کہا گیا ہے کہ کراچی کے جرمن قونصل خانے نے غیر یورپی یونین ممالک کے شہریوں کے لیے اپنی تمام قونصلر خدمات تاحکم ثانی معطل کر دی ہیں۔

اعلامیے کے مطابق غیر یورپی شہریوں کے تمام تصدیق شدہ ویزا اپائنٹمنٹس  بھی منسوخ کردی گئی ہیں جو دوبارہ سے شیڈول نہیں کیے جائینگے۔

ترجمان کا کہنا ہے کہ درخواست دہندگان کو ہدایت کی گئی ہے کہ وہ دوبارہ اپائنمنٹ حاصل کرنے کے لیے قونصل خانے کے آن لائن سسٹم کے ذریعے نئی رجسٹریشن کرائیں جبکہ قونصل خانے نے عوام سے تعاون کی اپیل کرتے ہوئے کہا ہے کہ کسی بھی نئی پیش رفت سے جلد آگاہ کر دیا جائے گا۔