کراچی ایئرپورٹ پر مسافر کو چھوڑنے اور لینے جانے والوں پر نئی پابندیاں

کراچی کے جناح ٹرمینل ائیرپورٹ پر سیکورٹی کے حوالے سے اہم فیصلہ کیا گیا ہے جس کے تحت پرواز کے مسافر کے استقبال و الوداع کہنے والے شہریوں کے پاس ٹکٹ کی کاپی لازمی قراردینے پر جلد عملدرآمد شروع کیا جائے گا۔

ذرائع کے مطابق پیر کو پاکستان ائیرپورٹس اتھارٹی کا اہم اجلاس ہوا،جس میں یہ فیصلہ کیا گیا کہ کراچی ائیرپورٹ پر مسافروں کو ائیرپورٹ لینے یا رخصت کرنے کیلئے آنے والے شہریوں کو بھی اب ٹکٹس کی کاپی لازمی رکھنا ہوگی۔

ہوائی اڈے آنے والے شہریوں کو سیکورٹی اداروں کے چیک کرنے پر ٹکٹس دکھانا لازمی قرار دیا گیاہے،ایک مسافر کے ساتھ 4 شہریوں کو ائیرپورٹ آنے کی اجازت ہوگی،جن شہریوں کے پاس ٹکٹ کی کاپی نہیں ہوگی انہیں ائیرپورٹ کی حدود میں داخل ہونے نہیں دیا جائے گا۔

پاکستان ائیرپورٹس اتھارٹی نے اس حوالے سےسیکورٹی کیلئے اقدامات کرلیے،مذکورہ اقدامات کے تناظر میں یہ فیصلہ بھی کیا گیا ہے کہ کراچی ائیرپورٹ پر مسافروں کو لینے کے لیے آنے والے شہریوں کو ٹکٹ کے ساتھ شناختی کارڈ بھی لازمی رکھنا ہوگا۔

ذرائع کے مطابق حالیہ دہشتگرد حملے کے پیش نظر مسافروں کے حوالے سے نئے اقدامات کا فیصلہ کیا گیاہے،یہ اقدام سیکورٹی کو مدنظر رکھتے ہوئے کیا گیاہے،پاکستان ائیرپورٹس اتھارٹی کے شعبہ ویجلنس نے پلان ترتیب دے دیا۔

نئے فیصلے پر نوٹیفکیشن کے اجرا کے بعد جلد عمل درآمدشروع کردیا جائےگا۔