خواجہ آصف کا متنازع بیان پر لیاقت محسود کو پاکستان چھوڑنے کا مشورہ

وفاقی وزیر دفاع خواجہ آصف نے ڈمپر ایسوسی ایشن کے صدر لیاقت محسود کو کراچی میں ٹریفک حادثات کے بعد شہریوں کی جانب سے بھاری گاڑیوں کو نذر آتش کرنے کے واقعات پر متنازعہ بیان دیتے ہوئے پاکستان کا بائیکاٹ کرنے کی دھمکی پر سخت تنقید کی ہے۔

خواجہ آصف نے ایکس (سابقہ ٹوئٹر) پر اپنے پیغام میں لیاقت محسود کے بیان پر ردعمل دیتے ہوئے کہا کہ جن کے پاس پاکستان کے علاوہ کوئی اور متبادل ہے وہ شوق سے جا سکتے ہیں لیکن انہیں ملک کی توہین نہیں کرنی چاہیے۔

انہوں نے اپنی پوسٹ میں لکھا، "جن کے پاس پاکستان کے سوا کوئی اور آپشن ہے اور وہ اسے استعمال کرنے کی خواہش کا اظہار کرتے ہیں، ایسے لوگوں کو پاکستان میں رہنے کی ضرورت نہیں ہے۔ پاکستان کی مٹی ہمارا پہلا اور آخری آپشن ہے۔"

اس سے قبل، لیاقت محسود نے کراچی کے پاور ہاؤس چورنگی کے قریب ایک موٹر سائیکل سوار کے ہلاکت خیز حادثے کے بعد کئی ڈمپروں کو آگ لگائے جانے پر سندھ حکومت پر سخت تنقید کی تھی۔

انہوں نے دعویٰ کیا کہ واقعے کے بعد کم از کم گیارہ ڈمپر نذر آتش کیے گئے۔

یہ واضح کرتے ہوئے کہ ان کا مقصد امن و امان کا مسئلہ پیدا کرنا نہیں تھا، لیاقت محسود نے دھمکی دی کہ اگر صورتحال بے قابو رہی اور اگر ان کے بقول "دہشت گردی کی کارروائیاں" نہ روکی گئیں تو وہ 'پاکستان کا بائیکاٹ' کر دیں گے۔

انہوں نے مزید کہا، "ہم رات تک سڑک بلاک کر دیں گے۔ میں نے قانون کو اپنے ہاتھ میں لینے سے گریز کرنے کی کوشش کی۔ ہم پاکستانی ہیں اور اللہ کو جواب دہ ہیں۔" انہوں نے حکام کی جانب سے ڈمپر آپریٹرز کی حفاظت کو یقینی بنانے میں ناکامی کی صورت میں ممکنہ احتجاج کا اشارہ بھی دیا۔