کے ایم سی نے کراچی کے شہریوں کو خوشخبری سنادی

کراچی: شہر قائد میں کراچی میٹروپولیٹن کارپوریشن (کے ایم سی)کی تمام پارکنگ سائٹس مفت کرنے کا فیصلہ کیا گیا ہے۔

میئر کراچی بیرسٹر مرتضی وہاب نے اس ضمن میں کہاکہ کے ایم سی کی پارکنگ سائٹس سے کوئی فیس وصول نہیں کی جائے گی اور یہ فیصلہ عوامی مفاد میں کیا گیا ہے۔

انہوں نے کہا کہ کے ایم سی اب اپنے پیروں پر کھڑی ہے، کے ایم سی کے اکانٹ میں 2 ارب روپے سے زائد موجود ہیں اور مزید کی توقع ہے اس لیے کے ایم سی کو 4 سے 5 کروڑ روپے کی ضرورت نہیں۔

مرتضی وہاب نے کہا کہ نوٹیفکیشن جاری کرکے شہریوں پر پارکنگ فیس کا بوجھ ہٹا دیا جائے گا جبکہ کے ایم سی کے نام پر غیر قانونی پیسے وصول کرنے والوں کے خلاف قانونی ایکشن لیا جائے گا۔

میئر کراچی نے کہا کہ کراچی کی 106 مرکزی سڑکوں میں سے 46 پارکنگ سائٹس سے فیس وصول نہیں کی جائے گی جبکہ 25 ٹائونز اور 6 کنٹونمنٹ بورڈز میں پارکنگ فیس برقرار رہے گی۔

کے ایم سی کے مالی حالات مستحکم ہیں، عوام کو سہولت فراہم کرنا ہماری اولین ترجیح ہے۔