الحمداللہ، افواج پاکستان نے قوم سے کیا گیا وعدہ نبھایا، ڈی جی آئی ایس پی آر

راولپنڈی: ڈی جی آئی ایس پی آر لیفٹیننٹ جنرل احمد شریف چوہدری ائیرفورس نے  نیوی افسران کے ساتھ پریس کانفرنس کی۔

پریس کانفرنس کرتے ہوئے ڈی جی آئی ایس پی آر لیفٹیننٹ جنرل احمد شریف چوہدری کا کہنا تھا کہ مسلح افواج نے عوام سے جو وعدہ کیا تھا وہ پورا کیا، وطن کے دفاع میں جان دینے والے شہدا کو خراج عقیدت پیش کرتے ہیں۔

الحمداللہ، افواج پاکستان نے قوم سے کیا گیا وعدہ نبھایا، بھارت نے جارحیت کرکے بے گناہ پاکستانیوں کا خون بہایا، بھارتی جارحیت کیخلاف پاکستان نے آپریشن بنیان مرصوص شروع کیا

اُنہوں نے کہا کہ پاکستانی افواج اپنے غیور اور بہادر عوام کاشکریہ ادا کرتی ہیں۔ 6اور7مئی کو بھارتی جارحیت سے بچوں اور خاتون سمیت معصوم افراد شہید ہوئے، بھارت نے آزاد کشمیر کی سویلین آباد کو بھاری ہتھیاروں سے نشانہ بنایا،ہمارے دل اور ہمدردیاں شہدا کے اہلخانہ کیساتھ ہیں۔

ڈی جی آئی ایس پی آرکا کہنا تھا کہ بھارت کے دو ایس400  دفاعی سسٹم کو پاک فضائیہ نے کامیابی کے ساتھ نشانہ بنایا، بھارت نے اگر دوبارہ خلاف ورزی کی تو اس سے زیادہ بھرپور انداز سے جواب دیں گے۔

ڈی جی آئی ایس پی آر نے کہا کہ پاک فوج نے آپریشن بنیان مرصوص میں پاکستان کے خلاف استعمال ہونے والے 26 ملٹری ٹارگٹس کو نشانہ بنایا گیا، اڑی نیٹ ورکس اسٹیشن اور پونچھ راڈار کو نشانہ بنایا، اللہ کا شکر ادا کرتے ہیں کہ اس نے فتح سے نوازا۔