پاکستان کی معروف پولیس افسر شہر بانو نقوی کے لئے اہم اعزاز

لاہور:پاکستانی خاتون پولیس افسر شہربانو نقوی ایشیا سوسائٹی 21 نیکسٹ جنریشن فیلو شپ کے لیے منتخب کرلی گئیں۔

ترجمان پنجاب پولیس کا اس حوالے سے کہنا ہے کہ اے ایس پی شہر بانو نقوی ایشیا 21 نیکسٹ جنریشن فیلو شپ کے لیے منتخب ہونے والی پاکستان کی تاریخ کی پہلی خاتون پولیس افسر ہیں۔

 ایشیا 21 نیکسٹ جنریشن فیلو شپ کے لیے خطے کے 27 ممالک سے مختلف شعبہ ہائے زندگی سے تعلق رکھنے والے 30 افراد کی غیر معمولی کارکردگی زیرغور آئی۔

ایشیا سوسائٹی نے اے ایس پی شہربانو نقوی کو کلاس آف 2025 میں معاشرے کے کمزور طبقات کے تحفظ، سسٹم میں تبدیلی کے حوالے سے گراں قدر کاوشوں، خدمات کے لیے منتخب کیا۔

پاکستان بھر کی نمائندگی کرتے ہوئے اے ایس پی شہربانو نقوی کو ایشیا 21 نیکسٹ جنریشن فیلوشپ کے لئے منتخب کیا گیا۔

فلپائن کے شہر منیلا میں ایشیا 21 نیکسٹ جنریشن سمٹ اسی سال 5 تا 7 دسمبر منعقد ہوگی، جس میں منتخب کیے گئے خواتین اور مرد معاشرے کو درپیش مسائل کے حل کے لیے ٹھوس تجاویز پیش کریں گے۔

اے ایس پی شہربانو نقوی کو آئی جی پنجاب ڈاکٹر عثمان انور نے دنیا بھر میں پاکستان اور پنجاب پولیس کا نام روشن کرنے پر مبارکباد دی۔

اُن کا کہنا تھا کہ اے ایس پی شہربانو نقوی جیسی باصلاحیت افسران مستقبل میں پولیس لیڈر شپ کیلئے اہم کردار ادا کریں گی۔پنجاب پولیس کے افسران کی کارکردگی کی عالمی سطح پر پذیرائی پاکستان پولیس سروس کیلئے فخر کی بات ہے۔