پارا چنار: مرکزی شاہراہ کھلوانے کیلئے جرگہ کامیاب، دھرنا ختم کرنے کا اعلان

امن مارچ کے شرکا اور انتظامیہ کے درمیان پارا چنار پشاور مرکزی شاہراہ کھلوانے کے لیے جرگہ کامیاب ہوگیا۔

ذرائع کے مطابق فریقین کے پاراچنار مرکزی شاہراہ کو محفوظ بنانے پراتفاق کے بعد سمیر کے مقام پر دھرنا ختم کرنے کا اعلان کردیا گیا ہے۔

قبائلی رہنما جلال بنگش کا کہنا ہے کہ پہلے مرحلے میں شاہراہ پر قافلے کی صورت میں آمد و رفت کی اجازت ہوگی اور مرکزی شاہراہ کو اگلے ہفتے سے آمد و رفت کے لیے بحال کردیا جائے گا۔

شاہراہ پر اضافی چیک پوسٹ اور سی سی ٹی وی کیمرے بھی نصب کیے جائیں گے۔

ڈپٹی کمشنر نے 12 اکتوبر کو مسافر گاڑیوں پر فائرنگ کے بعد سکیورٹی خدشات پر پارا چنار پشاور مرکزی شاہراہ بند کردی تھی۔

لاکھوں آبادی تقریبا ایک ماہ سے راستوں کی بندش کی وجہ سے اپنے علاقے میں محصور ہو گئی تھی، جس کے باعث علاقہ قبائل کی جانب سے امن مارچ اور دو روز سے احتجاجی دھرنا دیا جارہا تھا۔