پی ٹی آئی تاریخ کے شدید مالیاتی بحران کا شکار، 3 ماہ سے تنخواہیں نہ دی جاسکیں

پاکستان تحریک انصاف قانونی مشکلات کے بعد اب شدید مالیاتی بحران کا شکار ہوگئی ہے اور اس وجہ سے تین ماہ سے کارکنان و ملازمین کو تنخواہیں بھی ادا نہیں کی جاسکیں۔

پی ٹی آئی نے مالیاتی بحران سے نکلنے کیلیے پاکستان سمیت دنیا بھر میں چندہ مہم شروع کرنے کا فیصلہ کیا جبکہ ارکان اسمبلی و ٹکٹ ہولڈرز سے سالانہ 2 لاکھ چالیس ہزار روپے فنڈز مانگا ہے۔

پی ٹی آئی نے چندہ جمع کرنے کی ذمہ داری چیف وہیپ عامر ڈوگر اور پارلیمانی لیڈر کے سپرد کی جبکہ ارکان اسمبلی کو چھوٹ دی گئی ہے کہ وہ دو قسطوں میں فنڈز جمع کرواسکتے ہیں۔

ذرائع کے مطابق بانی پی ٹی آئی کو شدید مالی بحران اور ملازمین کو تین ماہ سے تنخواہیں نہ دینے کے حوالے سے آگاہ کیا گیا جس پر انہوں نے فنڈ ریزنگ شروع کرنے کی ہدایت کی۔

پی ٹی آئی چئیرمین سیکرٹری جنرل ایڈیشنل سیکرٹری جنرل کی طرف سے مراسلے بھجوائے گئے جس میں بتایا گیا ہے کہ پارٹی اس وقت تاریخ کے مشکل مالیاتی بحران سے گزر رہی ہے۔