اسرائیل کیخلاف جہاد کا فتویٰ دینے والے مفتی آگے بڑھیں، اخراجات میں برداشت کروں گا، فواد چوہدری

سابق وفاقی وزیر فواد چوہدری نے اسرائیل کے خلاف جہاد کا فتویٰ جاری کرنے پر مذہبی سکالرز کو تنقید کا نشانہ بناتے ہوئے زور دیا کہ ایسے فتوے جاری کرنے والوں کو خود مسلح جدوجہد میں سب سے آگے ہونا چاہیے۔

ایکس (سابقہ ٹوئٹر) پر ایک پوسٹ میں فواد چوہدری نے ان مذہبی سکالرز کے سفری اخراجات برداشت کرنے کی پیشکش کی جو اسرائیل کے خلاف جنگ کرنے اور فلسطینیوں کی مدد کرنے میں "دلچسپی" رکھتے ہیں۔

ان کا یہ بیان پاکستان کے ممتاز مذہبی سکالر اور صدر وفاق المدارس العربیہ مفتی تقی عثمانی کی جانب سے جمعرات کو جاری کیے گئے ایک فتوے کے جواب میں سامنے آیا، جس میں انہوں نے اعلان کیا تھا کہ غزہ کے لیے جہاد مسلم حکومتوں پر فرض ہو گیا ہے۔

مفتی تقی عثمانی نے کہا تھا کہ 50 ہزار سے زائد مسلمان "اسرائیل کے ہاتھوں ذبح" ہو چکے ہیں اور اب وقت آگیا ہے کہ پاکستان سمیت اسلامی حکومتیں ٹھوس اقدامات کریں۔

انہوں نے اسرائیلی مصنوعات اور اسرائیل کی حمایت کرنے والی کمپنیوں کے مکمل اور پرامن بائیکاٹ کا بھی مطالبہ کیا اور کہا کہ احتجاج کے دوران جان یا مال کو نقصان پہنچانا اسلام میں منع ہے۔

فواد چوہدری نے طنزیہ لہجے میں کہا کہ جب علماء دوسروں کو لڑائی میں شامل ہونے کی ترغیب دے رہے ہیں تو انہیں خود صف اول میں ہونا چاہیے۔

انہوں نے ایکس پر اپنی پوسٹ میں لکھا، "جن علماء نے آج اسرائیل کے خلاف جہاد کا اعلان کیا ہے وہ بالکل درست کہہ رہے ہیں۔ اس نیک مقصد کے لیے میں نے ذاتی طور پر پاکستان کے 100 معزز علماء اور سکالرز کے غزہ کے سفر کے اخراجات برداشت کرنے کا فیصلہ کیا ہے۔"

انہوں نے مزید کہا، "مجھے امید ہے کہ یہ بزرگ، جو آج پرجوش تقاریر کریں گے، اس شاندار پیشکش کو بخوشی قبول کریں گے، کل اپنے پاسپورٹ جمع کرائیں گے، اور انشاء اللہ اپنے سفر پر روانہ ہوں گے۔"

فواد چوہدری نے مذہبی سیاسی جماعتوں کو پاکستان میں کے ایف سی کے آؤٹ لیٹس میں توڑ پھوڑ کرنے پر بھی تنقید کا نشانہ بنایا اور ان پر زور دیا کہ وہ فلسطینی کاز کے لیے بامعنی انداز میں اپنا حصہ ڈالیں۔