ترک صدر کل 2 روزہ دورے پر پاکستان پہنچیں گے

ترکیہ کے صدر رجب طیب اردوان وزیراعظم شہباز شریف کی دعوت پر کل دو روزہ دورے پر پاکستان پہنچیں گے اور  12 سے 13 فروری تک پاکستان میں قیام کریں گے۔

ترکیہ کے صدر کے ہمراہ اعلیٰ سطح کا وفد بھی ہوگا جس میں وزراء، اعلیٰ حکام اور کارپوریٹ رہنما شامل ہوں گے۔ دورے کے دوران، دونوں ممالک کے درمیان تجارتی و معاشی معاہدوں پر دستخط کا امکان بھی ہے۔

ترک صدر اور وزیراعظم پاک ترک اعلیٰ سطح کے اسٹریٹیجک کوآپریشن کونسل کے ساتویں اجلاس کی مشترکہ میزبانی کریں گے جبکہ اجلاس کے اختتام پر اعلامیہ جاری کیا جائے گا اور متعدد ایم او یوز پر دستخط ہوں گے۔

دورے کے دوران صدر اردوان، وزیر اعظم شہباز شریف اور صدر آصف علی زرداری سے بھی دو طرفہ ملاقاتیں کریں گے۔

اس کے علاوہ وزیر اعظم شہباز شریف کے ساتھ وہ پاکستان ترکیہ بزنس اینڈ انویسٹمنٹ فورم سے بھی خطاب کریں گے، جس میں دونوں اطراف کے سرکردہ سرمایہ کاروں، کمپنیوں اور کاروباری افراد کو اکٹھا کیا جائے گا۔