یوم دفاع، مزار قائد پر گارڈز کی تبدیلی کی پروقار تقریب

کراچی: یومِ دفاع کے موقع پر بانیٔ پاکستان قائدِ اعظم محمد علی جناحؒ کے مزار پر گارڈز کی تبدیلی کی ایک پُروقار تقریب منعقد ہوئی۔

اس تقریب میں پاکستان ایئر فورس اکیڈمی اصغر خان کے کیڈٹس نے مزارِ قائد پر اعزازی گارڈز کے فرائض سنبھال لیے۔ تقریب کے مہمانِ خصوصی ایئر افسر کمانڈنگ، ایئر وائس مارشل شہریار خان تھے۔

ایئر وائس مارشل شہریار خان نے مزار پر حاضری دی، فاتحہ خوانی کی اور پھولوں کی چادر چڑھائی۔ اس موقع پر خطاب کرتے ہوئے انہوں نے کہا کہ پاکستان ایئر فورس اکیڈمی کے لیے مزارِ قائد پر گارڈز کے فرائض سنبھالنا ایک بڑا اعزاز ہے۔

انہوں نے مزید کہا کہ 6 ستمبر کا دن ہمیں یاد دلاتا ہے کہ ہم نے کس طرح دشمن کے عزائم کو ناکام بنایا تھا، اور آج بھی ہم ہر محاذ پر پوری طرح سے تیار کھڑے ہیں۔ ان کا کہنا تھا کہ پاک فضائیہ نے عوام کو کبھی مایوس نہیں کیا، اور ہمیں فخر ہے کہ پاک فضائیہ جنگ کے ساتھ ساتھ امن کے وقت میں بھی پیش پیش رہتی ہے۔