آئی فون 17 میں کیا خصوصیات ہوں گی؟ جانیے

ایپل کی جانب سے آئی فون 16 سیریز کو ستمبر 2024 میں متعارف کرائے جانے کے بعد، اب توجہ آئی فون 17 سیریز پر مرکوز ہو گئی ہے۔

حال ہی میں آئی فون 17 سیریز کے ڈیزائن اور دیگر حوالے سے لیکس سامنے آئی ہیں جن کے مطابق نئی سیریز کا ڈیزائن پچھلے ماڈلز سے کافی مختلف ہوگا، جس میں کیمرا سیٹ اپ اور ڈائنامک آئی لینڈ میں نمایاں تبدیلیاں شامل ہوں گی۔  

ایکس (ٹوئٹر) پر شیئر کی گئی ایک پوسٹ کے مطابق، آئی فون 17 سیریز میں بیک پر موجود اسکوائر کیمرا سیٹ اپ کو ختم کر دیا جائے گا۔ اس کی جگہ ایک نیا ڈیزائن اپنایا جائے گا، جو گوگل پکسل فونز کے پل (pill) کیمرا بار سے مشابہت رکھتا ہوگا۔

یہ تبدیلی ایپل کے اسمارٹ فونز کے کیمرا ڈیزائن میں 2020 کے بعد پہلی بڑی تبدیلی ہوگی، جب آئی فون 11 کو متعارف کرایا گیا تھا۔  

بلومبرگ کی ایک رپورٹ کے مطابق، آئی فون 17 سیریز میں فرنٹ کیمرے کے ڈائنامک آئی لینڈ کے حجم کو کم کیا جائے گا جبکہ ڈیزائن بھی پتلا ہوگا، یہ تبدیلی اسکرین کے ڈیزائن کو مزید جدید اور پرکشش بنائے گی۔  

آئی فون 17 سیریز کے ساتھ ساتھ، آئی فون 17 ائیر کے بارے میں بھی کئی لیکس سامنے آئی ہیں۔ 9 ٹو 5 میک کی رپورٹ کے مطابق آئی فون 17 ائیر ایپل کا اب تک کا سب سے پتلا فون ہوگا، جو آئی فون پرو ماڈلز کے مقابلے میں 25 فیصد پتلا ہوگا۔ یہ کسی بھی کمپنی کی جانب سے تیار کیا جانے والا سب سے پتلا اسمارٹ فون ہوگا۔  

آئی فون 17 ائیر کے بیک پر صرف ایک کیمرا ہوگا، جو ممکنہ طور پر 48 میگا پکسل کا ہوگا۔

اگرچہ یہ فون فیچرز کے لحاظ سے اسٹینڈرڈ ماڈل سے زیادہ خاص نہیں ہوگا، لیکن اس کا ڈیزائن اسے صارفین کے لیے انتہائی پرکشش بنا دے گا۔  رپورٹ میں آئی فون 17 ائیر کی ایک کانسیپٹ تصویر بھی شیئر کی گئی ہے، جس سے اندازہ ہوتا ہے کہ یہ فون کتنا پتلا اور جدید ہوگا۔ یہ تصویر فون کے ممکنہ ڈیزائن کو واضح کرتی ہے، جو ایپل کے پرستاروں کے لیے انتہائی پرجوش ہے۔  

آئی فون 17 سیریز اور آئی فون 17 ائیر کے بارے میں سامنے آنے والی لیکس سے ظاہر ہوتا ہے کہ ایپل اپنے نئے ماڈلز میں ڈیزائن کے لحاظ سے بڑی تبدیلیاں لا رہا ہے۔

کیمرا سیٹ اپ، ڈائنامک آئی لینڈ، اور فون کی موٹائی میں کی جانے والی تبدیلیاں اسے پچھلے ماڈلز سے بالکل مختلف بنا دیں گی۔ اب دیکھنا یہ ہے کہ ایپل ان تبدیلیوں کے ساتھ صارفین کو کس حد تک متاثر کر پاتا ہے۔