ڈیفنس تشدد کیس، سلمان فاروقی کیخلاف درج مقدمہ ختم

ڈیفنس فیز 6 تشدد کیس: سلمان فاروقی اور اویس ہاشمی کے خلاف مقدمہ ختم کردیا گیا۔

کراچی کے ڈیفنس فیز 6 میں پیش آنے والے نوجوان پر تشدد کے کیس میں اہم پیش رفت ہوئی ہے۔

کراچی سٹی کورٹ میں ہونے والی سماعت کے دوران مقدمے کے مدعی دھیرج عرف دھن راج نے سلمان فاروقی اور اویس ہاشمی کے خلاف مقدمہ نہ چلانے کا فیصلہ کیا اور اس حوالے سے حلف نامہ جمع کروایا۔

اس کیس نے سوشل میڈیا پر وائرل ہونے والی ویڈیو کے بعد خاصی توجہ حاصل کی تھی، جس میں ایک کار ڈرائیور کو موٹرسائیکل سوار دھیرج پر تشدد کرتے اور اس کی بہن کے سامنے بدتمیزی کرتے دیکھا گیا تھا۔

عدالت میں پولیس کی جانب سے پیش کردہ چالان اور سی کلاس رپورٹ میں بتایا گیا کہ دھیرج نے اپنے بیان میں کہا کہ وہ ملزمان کے خلاف کوئی کارروائی نہیں چاہتے۔

انہوں نے تحریری طور پر بیان دیا کہ سلمان فاروقی نے کوئی بدتمیزی نہیں کی اور یہ کیس غلط فہمی کی بنیاد پر درج ہوا تھا۔ دھیرج نے حلف نامہ بھی جمع کروایا کہ وہ مقدمہ آگے نہیں بڑھانا چاہتے۔ پولیس رپورٹ کے مطابق، دھیرج کے بیان کی بنیاد پر قتل کی دھمکیوں سمیت دیگر الزامات کو بھی ختم کر دیا گیا۔ 

اس سے قبل جون 2025 میں ایڈیشنل ڈسٹرکٹ اینڈ سیشن جج (ساؤتھ) نے ملزمان کی ضمانت کی درخواست مسترد کر دی تھی، کیونکہ عدالت نے دھیرج کے حلف نامے کو دباؤ یا جبر کے تحت جمع کروائے جانے کا امکان ظاہر کیا تھا۔ تاہم، تازہ پیش رفت کے بعد عدالت نے پولیس رپورٹ کی روشنی میں مقدمہ ختم کر دیا۔ یہ کیس گزری پولیس اسٹیشن میں درج کیا گیا تھا اور ویڈیو میں ملزم کی جانب سے دھیرج کی بہن کے ساتھ بدتمیزی اور دھمکیوں نے عوامی غم و غصے کو بھڑکایا تھا۔